VARIOS ISLA RECUPERANDO DI HORCAN Y OTRONAN CU PROYECCION FUERTE PA 2018
ORANJESTAD – Un di e eventonan mas grandi y importante den e industria turistico y hotelero pa nos region, ta e Caribbean Hotel Marketplace organisa door di Caribbean Hotel And Tourism Association (CHTA) cual ta un compromiso anual pa Oficina di Turismo Aruba (A.T.A.).
Ehecutivonan di Oficina di Turismo hunto cu representante di AHATA y e hotelnan local a participa, pa asina ta bon informa di con turismo pa Aruba ta canando pa cu aña 2018. Esaki ta obtene di tour operadornan cu ta bende Aruba, den e caso aki primordialmente na Merca, y kende por bisa pues cuanto benta tin pa Aruba y con esaki ta compara cu otronan den Caribe. E aña aki, e conferencia a tuma luga den e San Juan Convention Center na Puerto Rico.
E aña aki a inclui un enfoke special riba e estado di e industria turistico den Caribe, esaki despues cu varios isla y nacion a keda asota pa desasternan natural durante 2017. Aunke Aruba no ta un di e islanan directamente afecta, ta sigui ta importante pa sigui di cerca kico e consecuencianan ta pa nos propio mercado turistico. Kico esaki kiermen pa Aruba pa 2018 y pa 2019, ora cu varios di e destinacionnan cu a wordo asota pa horcan aña pasa bin ‘back on board’, renova? Esaki ta algo cu tin atencion di A.T.A. y otronan den e industria. Fuera di esey ta papia tambe di con otro proyectonan clave den Caribe ta moviendo y si esaki lo por impacta Aruba. Den e caso aki por pensa riba e proyecto hotelero di luho grandi na Bahamas, cu ta ‘Baha Mar’.
Pa Aruba e aña aki ta sigui mustra fuerte despues di un 2017 fuerte, pero manera indica e competencia lo ta bay ta aun mas fuerte, principalmente durante temporada halto di 2018/2019. Diferente ahustacion lo wordo haci unda ta necesario na mercadeo di Aruba pa asina cubri aspectonan cu a bin dilanti durante reunionnan.
Oficina di Turismo di Aruba, ta uza feedback ricibi pa ahusta strategia y defini pasonan cu mester tuma.
Esnan cu ta asisti na e conferencia ta consisti di operadornan turistico, agentenan di biahe, organisadornan di biahe incentivo, compania di turismo, etc. Reunionnan y contactonan sosteni durante e Caribbean Hotel Marketplace lo sigur yuda conduci na resultadonan beneficioso pa nos industria turistico.
Ehecutivonan di A.T.A. a reuni cu diferente ‘Corporate Offices’ di varios di e ‘brand-chain’ hotelnan na Aruba durante e bishita di trabou aki. Entre otro a reuni cu ehecutivonan di Marriot, Barcelo, Hyatt y Hilton. A pasa riba e resultadonan di 2017 y di biaha a bay over pa expectativanan, proyeccionnan y strategianan pa Aruba pa 2018-2019.
Aña 2017 a cera exitoso pa cu turismo pa Aruba, na unda a surpasa proyeccionan stipula di desaroyo pa cu 2017, (Tourism Receipts, RevPar y Turismo Crucero).
Como meta pa 2018, Aruba Tourism Authority ta proyecta pa aumenta e total di bishitantenan ‘stay-over’ pa nos isla cu 3.7% mientras expectativa pa turismo crucero ta un aumento di 7%, y pa RevPAR ta proyecta un crecemento di 0.8%. E proyeccionnan aki naturalmente ta compara cu e resultadonan di 2017.
Oficina di Turismo ta contento cu esfuerzonan strategico haci hunto cu partnernan local y internacional cual ta dunando nan fruto. A.T.A. ta sigui prepara y traha duro riba programanan dirigi riba mercadeo di Aruba y riba desaroyo di nos producto turistico.