El a keda impresiona cu e desaroyonan rond di energia renoba y maneho di desperdicio
ORANJESTAD, Aruba – EcoGas a ricibi bishita di e Consul General di Merca di cual e gerente di e planta, Ramsey Halabi, a topa cun’e. Margaret D. Hawthorne, “US Consul General and Chief of Mision to the Dutch Caribbean”, a ricibi un recorido pa e haya sa kico tur ta haci den e planta. E merdia tabata uno masha ameno mes, unda cu Ramsey Halabi a splica di e trabounan di preparacion, e retonan, e logronan y e forma profesional con ta procesa desperdicio y deshaci di dje na un forma eficiente.
“El a keda hopi impresiona. E ta hopi den e mundo di waste energy”, asina Ramsey Halabi a expresa despues di e encuentro. Margaret Hawthorne ta fascina cu e mundo ey y e ta hopi interesa den dje. Tambe e sa hopi di e materia aki. E combersacion tabata uno ameno di cual hopi idea a bin dilanti, pero Margaret Hawthorne tambe a bin cu ideanan y sugerencianan riba mesa, locual EcoGas a aprecia. A cana rond cu e Consul, pa e mes admira y experiencia con e planta ta funciona.
E tabata na Aruba pa reuni cu e Gobierno nobo, pero tambe cu companianan y otro individualnan. “Awe mi a pasa un atardi agradabel aki na EcoGas cu Ramsey Halabi”, asina el a duna di conoce. E tabata hopi interesa den energia y e representante di Gobierno di Merca tambe tabata interesa den siguridad y tambe den energia renoba. Tambe nan tin interes riba kico Caribe ta haciendo cu energia.
Margaret Hawthorne a bin pa mira y scucha kico EcoGas ta haci cu innovacion y ideanan nobo con pa genera energia. Tambe con pa deal cu e reto cu hopi isla tin, esta con pa lidia cu desperdicio. E bishita aki realmente tabata un “eye opening” y emocionante. Tambe e tabata un experiencia pa scucha kico tur ta haci na EcoGas, algo practicamente unico na mundo pa loke ta maneho di desperdicio.
EcoGas ta e prome fabrica di gasificacion di su tipo den Caribe y Latino America, pero tambe Norte America. Meta di EcoGas ta pa baha e cantidad di desperdicio nobo cu ta deposita riba dump. Un otro meta ta pa EcoGas sirbi como ehempel pa otro paisnan y bende e experticio cu otro pais y companianan den exterior.
Aruba actualmente tin 100 pa 110 mil ton di sushi anualmente cu por procesa den e planta. Esaki ta exclui sushi manera santo, piedra, concret, etc. cu ta wordo procesa na un otro forma. Pa un isla manera Aruba cu 100 mil habitante y un miyon turista pa aña, esaki ta un cantidad hopi grandi di desperdicio, pero mester tene semper den mente cu Aruba ta importa tur cos y no ta fabrica nada cu ta uza e materialnan importa localmente. Hasta paña cu no ta wordo uza mas ta wordo tira afo, tanten cu na hopi otro pais hasta paña ta wordo recicla y exporta.
EcoGas ta traha cu personal tecnico bon entrena, y ta sigui train mas personal pa asina nan ta cla pa exporta e experticio pa otro paisnan y companianan interesa den sigui e pasonan di EcoGas.