Home Politics BISHITA DI CONSUL MERICANO CERCA GOBIERNO

BISHITA DI CONSUL MERICANO CERCA GOBIERNO

SHARE

Diahuebs prome di februari, Consul General di Merca na Willemstad, Sra Margaret D.Hawrhorne a haci un bishita na Minister President Evelyn Wever-Croes y Minister di Husticia Andin Bikker.

Prome Minister a indica cu varios temanan di interes comun a wordo toca durante e reunion. Pa hopi tempo ta existi un bon relacion entre Aruba y Merca. Naturalmente e intencion di Gobierno ta pa continua cu e bon relacion aki.

E bishita di e Consul ta debi cu Merca tin hopi interes pa conoce e vision di Gobierno nobo di Aruba. Gobierno a duna nan un splicaccion extenso di e varios retonan cu a wordo encontra, entre otro e reto financiero, reto social y reto cu Venezuela.

E mandatario a duna di conoce cu aparte di a elabora riba e retonan encontra, Gobierno a splica cu ta enfocando riba e vision di Gabinete Wever-Croes pa pone e ser humano central un biaha mas. Gobierno ta trahando duro pa soluciona e problemanan financiero di nos pais, brinda cabes na e problemanan social den nos comunidad y ta percura pa un desaroyo economico realistico y sostenibel.

Otro temanan di vision di Gabinete Wever-Croes cu tambe ta un parti hopi importante cu a wordo toca ta e temanan di integridad, bon gobernacion y innovacion. Innovacion kiermeen haci cosnan na un forma diferente y mas moderno.

Prome Minister ta bisa cu tur e temanan aki a cay riba bon tera cerca e Consul Mericano.

E reunion a bay den un bon esfera y compromisonan a keda di ambos banda pa sigui cu e bon relacion entre Aruba y Merca.