Home » Prome Minister Evelyn Wever-Croes: Tur hogar na Aruba lo sinti e cambio: GOBIERNO DI ARUBA HUNTO CU WEB, ELMAR Y UTILITIES LO PERCURA PA TUR FAMIA TIN CONEXION DI AWA Y CORIENTE

Prome Minister Evelyn Wever-Croes: Tur hogar na Aruba lo sinti e cambio: GOBIERNO DI ARUBA HUNTO CU WEB, ELMAR Y UTILITIES LO PERCURA PA TUR FAMIA TIN CONEXION DI AWA Y CORIENTE

by Admin
0 comment 55 views

ORANJESTAD—Prome Minister Evelyn Wever-Croes a elabora riba e tema di energia specialemente di e famianan di kendenan awa y coriente a wordo corta. Na mas di un ocacion, e mandatario a indica cu e vision di Gabinete Wever-Croes ta pa baha e gastonan di awa y coriente. Haci e prijs di awa y coriente accesibel pa tur famia y percura pa tur cas na Aruba tin acceso na awa y coriente.

E mandatario ta bisa cu esaki ta mas facil pa bisa cu pa haci mirando cu tin miles di famia na Aruba cu no tin awa y coriente y e tema aki varios biaha a wordo trata den Conseho di Minister. Prome Minister ta elabora riba e tema aki:

“Mi por anuncia awo cu hunto cu WEB, Elmar y Utilities, nos a yega awo na un situacion di solucion pa famianan cu no tin conexion di awa y coriente actualmente. Danki na e contribucion cu WEB y Elmar ta bay haci, nos ta bay institui un fondo financiero cu ta wordo sostene door di e companianan y ta bay resorta bou di supervision di Departamento di Asuntonan Social.

Un famia cu no tin conexion di awa y coriente por yega na e departamento aki, y lo pasa door di un procedura di screening. Famianan cu tin problemanan social y cu di berdad tin mester di ayudo lo bin na remarke pa haya conexion inmediato di awa y coriente. Pa esaki lo uza un tipo di meter prepaga. Y despues di esaki lo sigui e procedura di areglo di pago cu facilidad di pago hopi amplio pa e suma cu tin habri.

E hecho cu tin miles di famia ta bibando sin awa y sin coriente ta un tema hopi preocupante y di molester pa e Gobierno aki. Y esaki tawata un di e prome cosnan cu a hiba prioridad cerca Gabinete Wever-Croes. Tur mucha, tur adulto, tur hende di edad, tur hogar na Aruba, irespecto e situacion financiero, tin derecho riba awa y coriente y Gobierno lo percura pa tur hogar haya esakinan tambe.

Esaki ta un decision cu a wordo tuma e siman aki den Conseho di Minister. Awo nos ta den e proceso di ehecucion y pronto lo anuncia e prome famianan cu lo bin na remarke pa esaki yega e Departamento di Asuntonan Social pa pasa e procedura pa haya un meter prepago y pa yega na un areglo di pago di pasado sin tin mester bay WEB y Elmar cu e tema aki pasobra e lo wordo administra door di e Departamento di Asuntonan Social. Cu esaki Gobierno di Aruba ta cumpli cu e compromiso cu nos a haci cu tur cas na Aruba mester tin awa y coriente”.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio