Home International Presidente di Cft Raymond Gradus: “Stap concreto pa mehoramento di maneho financiero...

Presidente di Cft Raymond Gradus: “Stap concreto pa mehoramento di maneho financiero y stabilidad administrativo ta necesario

Kralendijk – Durante su bishita di dia 30 di januari na Boneiro Colegio di supervision financiero di Boneiro, Sint Eustatius y Saba (Cft) a pidi Colegio Ehecutivo y Conseho Insular pa tuma e stapnan necesario pa pone ordo den e maneho financiero. “Cft pa basta tempo caba a pidi atencion pa e problematica aki y awor kier mira mas adelanto”, segun Presidente di Cft Raymond Gradus.

Durante su bishita Colegio a combersa cu Gezaghebber, Colegio Ehecutivo, e Representante di Reino suplente y Conseho Insular. Tambe a haci un bishita di trabou na Tourism Corporation Bonaire (TCB). Di TCB Colegio a haya un splicacion extenso di e plan maestro pa futuro di turismo na Boneiro y su importancia pa economia.

Cu e Diputado di Fianansa a papia extensamente tocante e stapnan cu lo mester tuma pa mehora e maneho financiero y e retonan pa loke ta ehecucion di presupuesto di 2018. Durante e combersacion a trata tambe e notanan marginal manera nan ta inserta den e carta di aprobacion di presupuesto di 2018 di Secretario di Estado di Asunto Interno y Relacion den Reino Raymond Knops. E notanan marginal ta: pone ordo den e maneho financiero, yena e funcionnan crucial den e aparato gubernamental cu personal cualifica adecuado, tuma e stapnan necesario pa entrega na tempo e cuentanan anual di e entidadnan publico y intensiva e tarea di control riba e entidadnan publico. A papia extensamente tocante yenamento di e resto di vacatura crucial cu ainda ta habri. Colegio Ehecutivo a priminti di manda un carta pa Cft tocante e estado actual.

Ademas a delibera tocante hustificacion y ehecucion di e presupuesto di 2017. Cft ta spera di por dispone na termino cortico di e reportahe di e di cuater kwartaal y ta enfatisa cu e reportahenan aki primordialmente ta di importancia pa Colegio Ehecutivo y Conseho Insular pa duna contenido na nan tarea ehecutivo y controlado na un forma corecto.

E desaroyonan den algun NV di Gobierno ta preocupante. Colegio a pidi atencion special pa esey, ya cu e desaroyonan aki posteriormente (por) ta di influencia riba presupuesto di gobierno. Colegio Ehecutivo a priminti pa laga ehecuta revision di cuenta operacional riba e NV-nan di Gobierno. Tambe entrega na tempo di e cuentanan anual di e entidadnan publico y aplicacion di e codigo di bon gobernacion ta di vital importancia pa mantene bista riba e estado actual y pa por haci un calculacion di riesgo adecuado.

En bista di e hopi cambionan di gobierno for di 2010 Colegio a bolbe trece na atencion di Colegio Ehecutivo y Conseho Insular cu stabilidad administrativo ta di gran importancia pa economia y pa sociedad di Boneiro.