Oranjestad – E emisora Radio Bo Guia 88.9FM na november ultimo a cumpli 20 aña di existencia. Desde su lansamento como radioemisora cu e frequencia 88.9FM, e ta un emisora conoci pa ta sostene nos cultura na prome luga.
Anualmente un cantidad di produccionnan musical ta wordo produci localmente durante e.o. Dia di Betico, Dia di Himno y Bandera y otro ocasionnan, si esakinan no wordo promoví nan ta desparce, pero radio Bo Guia a bin ta promoviendo nos produccionnan musical local diariamente den nan programacion radial.
Durante un ocasion special Minister señora mr. Xiomara Ruiz-Maduro den nomber di Gobierno di Aruba a haci entrega di un reconocimento na Radio Bo Guia pa nan aporte na engrandece nos cultura arubano.
Henter e staff di Bo Guia tabata presente na momento cu Minister Ruiz-Maduro a haci e entrega di e reconocimiento, cual a wordo ricibi pa señora Miriam “Mimi” Rosel-Koolman, kende den nomber di e famia di Bo Guia a gradici Gobierno di Aruba y muy enparticular Minister Ruiz-Maduro pa e reconocimiento, cual sigur ta wordo aprecia grandemente y ta un estimulo pa sigui aporta y engrandece nos cultura.
E reconocemento aki ta den cuadro di e maneho di Minister di Cultura pa sigui motiva y stimula esnan cu ta aporta na promove, sostene y engrandece nos cultura arubano.