AVB lo traha hunto cu KNVB y Unicef Nederland na Sint Maarten
Mayoria veld di futbol destrosa y mayoria muchanan traumatisa
ORANJESTAD, Aruba – Koninklijke Nederlandse Voetbalbond (KNVB) y Unicef Nederland a pidi Arubaanse Voetbal Bond (AVB) pa traha hunto den e proyecto di restauracion di St. Maarten, di cual studiantenan di scolnan basico y secundario lo haya yudansa por medio di e deporte futbol, pa yuda nan lidia cu e consecuencianan di horcan Irma. Di biaha AVB a bay di acuerdo pa yuda y a manda nan coordinador tecnico Elvis Albertus pa 100 dia, cu lo ta disponibel pa traha cu KNVB y Unicef na St. Maarten pa ehecuta e programa aki.
Dia 1 di Februari 2018, Elvis Albertus a biaha pa St. Maarten y hunto cu colega Hulandes, Piet de Jong, lo guia e coachnan local di e isla cu futbol y “Life Skills” segun e programa di “WorldCoaches” di cual Aruba ta forma parti di dje desde November 2016. Studiantenan lo haya training y tayernan y hunto cu St. Maarten Football Federation lo tin mas o menos 20 scol cu lo participa na competencia di scol. E coachnan local di otro deporte lo cera conoci cu e “Life Skills” desde e programa di “WorldCoaches”. Scolnan secundario ta haya e posibilidad pa siña e prome prinicipionan di formacion futbol pa hobennan y combina esaki cu e supervision di scol basico y muchanan di vecindario.
Cu e cooperacion entre AVB y KNVB, Elvis Albertus a haya training den e ultimo 10 añanan pa haci e tipo di trabounan aki na Aruba y awo e lo comparti su experiencia cu St. Maarten.
Desasternan natural tin un impacto grandi na e bienestar psicosocial y desaroyo di muchanan. Durante e horcan Irma na St. Maarten inevitablemente a obliga e muchanan riba e isla pa keda paden cu nan famia of tutor pa oranan y nan tabata exponi na zonidonan fuerte di biento di 185mph. Algun mucha a presencia e desintegracion di nan cas y nan a sinti e urgencia pa establece na un otro luga.
Despues di e horcan, algun mucha ainda tabata separa di nan ruman homber y ruman muhe of mayornan cu a laga e isla pa sigui cu nan educacion of haya un otro trabou den exterior. Algun mucha ainda ta biba den condicionnan di bida deteriora, cu mayornan sin trabou y cu entradanan reduci, ta comparti luga cu varios famia, ta biba den refugio temporal di gobierno of den casnan cu acceso limita na servicionan.
Medionan di comunicacion y Polis local a confirma informacionnan di un aumento den violencia domestico desde e desaster, di cual ta algo preocupante pasobra hopi biaha muchanan ta esunnan cu ta keda exponi y ta victima di eventonan traumatico. Despues di Irma, hopi mucha ainda ta sinti nan mes indefenso pasobra nan no por cuida nan mes of nan famia. Tur experiencia, circunstancia y cambio di bida anterior por tin consecuencia di biaha y plaso largo pa muchanan, nan famia y comunidad y ta reduci su capacidad di funciona.
Pa reduci e consecuencianan di e situacion di desaster p’e muchanan, despues di e desasternan y durante e recuperacion, Unicef ta promove lihe e reapertura, e fortalecemento of establecimento di zonanan faborabel pa muchanan, manera “kinderdag verblijf”, scol y “naschoolse opvang centrum”, unda e muchanan por ta den un ambiente sigur y stimulante y por participa den actividadnan positivo y interactivo cu ta facilidadnan pa hendenan grandi cu ta destina pa proteha nan. E profesionalnan cu ta traha directamente cu muchanan na St. Maarten tambe a ricibi e golpinan duro di horcan Irma y hopi no tin e habilidad necesario pa yuda e muchanan den e proceso y e expresion efectivo di nan emocion y experiencia despues di Irma. Di e manera aki, Unicef ta reconoce cu pa yuda muchanan, e adultonan cu ta traha cu nan, tambe mester conta cu e apoyo y e capacidad pa haci esey.
E implementacion di e proyecto aki mester contribui na reduci e cantidad di muchanan cu ta mustra signonan di stress emocional. Unicef lo apoya e profesionalnan cu ta traha cu muchanan y hobennan pa garantisa cu nan, nan empleado y muchanan cu nan ta traha cun’e, adopta mecanismonan di enfrenta psicosocial positivo di cual pa futuro lo permiti nan minimisa e efectonan negativo di e horcan Irma y e desasternan natural inevitabel.