Paradera: Diabierna den careda di 1’or di marduga, un poco pariba di Subway Paradera, polis ta wordo notifica cu tin un dama histerico sinta canto di caminda.
Na yegada di e prome patruya, enberdad nan ta topa cu un dama canto di caminda, e dama tabata kehando di dolor den pecho y e tabata tin un cuchiu cune.
Ela splica e agentenan cu e la bay haci un familiar di su ex pareha un fabor y tambe ela bay hiba e pañanan di su ex bek, pero su ex a coi e yabi di auto for di dje y kier a bay su so cu e auto di dama, e dama no tabata kier esaki y tambe a bula den su auto.
Segun e dama, e la bay cu un cuchiu pa defende su curpa, paso su ex pareha semper tabata maltrat’e fisicamente.
Un poco pariba di Subway, cos a bay for di man, aparentemente e homber lo a dal e dama y esaki na su turno a rask’e cu e cuchiu, pa evita di haya mas golpi e dama a dicidi di bula for di auto y e homber a sigui core.
Segun e dama e auto ta di dje y cu e homber a bay sin su permiso cu e auto y cu tambe e kier a entrega un keho. Mientras cu un patruya di polis tabata buskando rond pa e auto, presencia di ambulance a wordo pidi na e sitio pa controla e dama pa e dolor den pecho cu lo tabata tin.
Despues di algun minuut, un patruya ta bin topa e Nissan Fuga di e dama na Solito. Mesora e patruya a bisa e homber pa e acompanianan, nan a bay na e sitio na Shiribana, despues cu personal di ambulance a controlanan y polis a papia cu tur dos, e dama a bandona e sitio den su auto y e homber a bay na pia.