Home » Segun Parlamentario Sue-Ann Ras: “Pakico cambia Enseñansa tradicional pa Scol Multilingual?”

Segun Parlamentario Sue-Ann Ras: “Pakico cambia Enseñansa tradicional pa Scol Multilingual?”

by Admin
0 comment 59 views

Recientemente tabatin un reunion hopi interesante cu varios director di e departamentonan cu ta cay bou enseñansa hunto cu Minister Rudy Lampe y Parlamentario Sue-Ann Ras tambe a haya invitacion di minister pa ta presente.

Manera ya anuncia, januari a inicia e periodo di orientacion pa loke ta trata Scol Multilingual, cu ta un programa multilingual como parti integral di siñamento y desaroyo duradero. Mester remarca cu e reunion aki a bay den un ambiente hopi positivo y e disposicion t’ey di parti di tur stakeholders en cuestion y ta trata di: Departamento di Enseñansa, SKOA, SMOA, SPCOA, SOAZA, Enseñansa pa Empleo, Universidad di Aruba, MDC, SVGA, DPS, Unesco Aruba, Inspectie Onderwijs, SEPB, SAA, IPA y Biblioteca Nacional Aruba. E interes t’ey pa nos mehora calidad di enseñansa cu ta brindando nan nos muchanan, ya cu cifra ta indica cu mester haci algo, sino nos lo tin mas drop out y menos alumno motiva pa termina nan estudio.

Pakico cambio den nos enseñansa?

  • E porcentahe di ripiticion ta demasiado halto y tin un gasto adicional pa cada alumno, maestro y local extra. Ta papia di Awg. 1,468,592 pa aña y e klas cu mas tin ripiticion ta klas 1 cu tin un averahe di Awg. 578,942 (averahe di e añanan 2009-2013) y klas 4 un averahe di Awg. 278,148 (tambe ta un averahe di e añanan 2009-2013). Esaki segun investigacion di Departamento di Enseñansa.
  • Grado di educacion di sector laboral 15-65 aña: LBO/MAVO 69%, HAVO/VWO 19% y HBO/WO 12% y esaki ta segun fuente CBS Aruba 2010.  Remarcabel ta cu na 2000 tabatin un total di 33% comunidad laboral cu scol basico/sin scol y na 2010 esaki a aumenta na 40%.

Meta ta pa nos Aruba 2025 nos yega na un comunidad multicultural cu ta biba den harmonia, cu un calidad di bida halto, trahando hunto cu deseo verdadero pa crea un Aruba desaroya den un forma sostenibel pa e futuro generacion. P’esey nos mester aumenta e nivel di educacion y logra 20% di nos populacion cu un nivel tercero di educacion (HAVO/VWO) y no mane e ta na 9% (CBS 2010).   

Pa nos mucha- y hobennan ta ekipa cu e hermentnan y conocemento pa siglo 21, cu ta e habilidadnan cognitivo, nos tin cu brinda nan e oportunidad pa no solamente siña pa punto, manera ta nos tradicion y mara e mucha na un punto, sino siña pa compronde, aplica y transforma informacion. E beneficionan cu Scol Multilingual ta brinda nos muchanan ta cuantioso, specialmente si sali for di punto di salida cu na nos scolnan preparatorio, unda tin un cantidad di 2640 alumno ta bay, tin 80% di e muchanan cu nan idioma materno Papiamento y na scol basico, unda tin un cantidad di 8938 alumno, 73% di e muchanan tin Papiamento como idioma materno (fuente DEA 2014-2015).

“Cambio realmente NO ta facil, pero nos tin cu ta realistico y permiti espacio pa bin cu algo cu sigur lo beneficia nos futuro generacion, unda tin un innovacion holistico di enseñansa primario na Aruba pa realmente nos yega na un Aruba sostenibel y duradero”, Parlamentario Sue-Ann Ras a afirma.   

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio