Durante e conferencia di prensa ultimo, lider di fraccion di MEP sr. Rocco Tjon a papia tambe riba e desaroyo andando na e Instituto Coreccional Arubano (KIA). El a trece padilanti cu e situacion cu Cuerpo Policial ta pasando aden tambe ta tumando lugar na KIA, ya cu aki tambe no tin un mando fiho. Sin duda mester yega na un proceso caminda mas lihe posibel mester yena e funcion ey y p’asina e organisacion por sigui desaroya su mes. Segun sr. Tjon, tin un reorganisacion andando na KIA cu tambe ta un punto di hopi preocupacion cerca hopi di e personal. Tin diferente proyecto cu wordo laga cla pa wordo implementa pero te cu awe ainda no a ser implementa y ta causando no solamente disgusto bao di e personal pero tambe ta causa un situacion insigur na e instituto aki. Tambe tin hopi compania cu ta cla pa ehecuta e proyectonan aki pero te awe no por logra na ehecuta nan.
Sinembargo, fuera di e preocupacionnan menciona tin algun punto positivo y di elogio tambe pa loke ta e desaroyo na KIA. Asina por mira cu e mandatario di husticia actual durante e ultimo Justitieel Vierpartijenoverleg a logra haya commitment di tur pais pa loke ta trata e prison duradero. Esaki ta un aspecto hopi importante cu ta bay trece solucionnan a termino largo. Sinembargo mester tene cuenta si cu tin diferente aspecto cu mester wordo yuda mesora y pa e aspectonan aki tambe ta rekeri recursonan y sr. Tjon ta spera di mira esaki bek den e presupuesto cu lo ser entrega aki algun siman.
Finalmente sr. Tjon como voorzitter di e comision di asuntonan hudicial a invita e mandatario actual di husticia pa otro siman pa bin durante un reunion cu e comision y p’asina elabora y discuti riba diferente desaroyo pa loke ta Cuerpo Policial y Instituto Coreccional Arubano.