No tin palabra pa describi e ridiculez y disparate cu a ser ventila recientemente pa e parlamentario di AVP, Richard Arends caminda el a declara despues di un reunion cu e delegacion di IMF cu “IMF a pidi fraccion di AVP pa yuda gobierno concretisa un maneho financiero”. Sin duda cu e peticion aki ta un mentira flagrante cu a ser fabrica pa AVP ya cu henter e delegacion di IMF mes ta consciente kende tabata sinta dilanti nan den e reunion cu nan a tene cu fraccion di AVP. Nada mas y nada menos cu Richard Arends kende durante practicamente henter e periodo di Gabinete Eman y ‘from day one’ a fungi como consehero principal pa e ministernan di Finansa y Economia, esta Mike de Meza y Juan David Irausquin y tambe Minister President Mike Eman.
Deficit total di 2.1 biyon florin
Fuera di esey Richard Arends mes a ocupa tambe e funcion di minister di Economia durante e ultimo añanan di Gabinete Eman. Y kico nos por a mira di tur su conseho y trabaonan cu el a desplega durante 8 aña di tempo? No tin un miho manera pa describi esaki cu no ta mediante e tabel adhunto, caminda un y tur por mira e desaster financiero y economico cu a ser ocasiona tambe pa Richard Arends. Nos por mira den e tabel un deficit financiero cu den total ta suma na 2.1 biyon florin durante 7 aña di tempo y caminda a registra recordnan nunca bisto di mas di 400 miyon florin na 2012 y 2014. E pregunta awor ta na Richard Arends, ta di e forma aki boso fraccion kier bay yuda e gobierno nobo di MEP, POR y RED cu e parti financiero?
Debenan y caidanan economico
Den e tabel tambe por mira e desaroyo di nos debe nacional, cu Gabinete Eman a haya na 2.2 biyon florin na 2009 y den apenas 7 aña di tempo nan a logra aumenta esaki te na 4 biyon florin na 2016 y esaki sin conta acerca tur e debenan den e proyectonan PPP cu ta suma na mas di 2 biyon florin extra. Anto ta cu e malehempel aki riba e aspecto financiero e fraccion di AVP lo kier bay yuda e gobierno actual?
Pa loke ta e crecemento economico, esaki tambe a resulta den un fracaso total, caminda a registra caidanan den nos economia y specialmente durante e ultimo 3 añanan di Gabinete Eman. Ta increibel con e gobierno di AVP a ricibi y fia asina tanto biyones di florin durante 8 aña y toch nan no a logra crece nos economia. Cu esaki e filosofia di Mike Eman, esta “eerst snoeien, dan groeien” a cay completamente na awa. Pregunta ta si Richard Arends tambe ta lesa buki bieu di economia y cu si ta di e forma aki e lo kier bay yuda gobierno concretisa un maneho economico?
Boycott y Sabotahe
Partido MEP ta convenci cu e miembronan di e delegacion di IMF tambe ta bon na altura di tur e cifranan financiero-economico cu ta indica den e tabel adhunto y siguramente nan lo a hari bariga yen ora cu e fraccion di AVP a bandona e sala di reunion, ya cu nan sa bon bon kendenan tabata e autornan principal den e desaster financiero y economico di nos pais. Tambe nan sa precisamente kendenan tur a boicotia y sabotia henter e traspaso di gobernacion di nos pais y kendenan a horta tur ekipo y documento for di den Bestuurskantoor. MEP ta convenci cu e delegacion di IMF lo tabata tin berguensa di reuni cu e fraccion berde mirando tur e bagamunderianan cu nan a comete pa stroba e gobernacion nobo pa funciona y produci cifranan actual cu IMF tambe lo por a haci uzo di e cifranan aki.