Parlamentario Tevreden di MEP: Pa otro siman lo mester tin claridad riba henter e proyecto di Green Corridor

Durante e conferencia di prensa di diaranson ultimo, parlamentario Hendrick Tevreden a elabora riba Green Corridor, caminda tin tur indicacion cu e proyecto aki ta e proyecto di mas corupto cu pais Aruba a yega di conoce den e ultimo añanan. A base di esaki e siman venidero lo tin un reunion den e comission fiho di Parlamento hunto cu e Minister di Infrastructura, pasobra tin un intrankilidad grandi ta reina riba e e proyecto aki: un proyecto di 292 miyon, cu mester ser paga den 20 aña y cu ta costa 13.2 miyon pa kilometer. Den e reunion di otro siman lo mester por saca afo kico ta e resultadonan te cu awor pa loke ta henter e desaroyo di Green Corridor. Echo ta cu tin demasiado pregunta cu ta colga den laira.
E proyecto aki no a wordo guia segun principio di palabracion. DOW ta di opinion cu e proyecto no a ser entrega na tempo. Tambe e proyecto a cambia di diferente compania. A cumpra over cada vez e contract y na september ultimo e proyecto a drenta den un fase di crisis. Echo ta cu Aruba ta den un situacion hopi precario cu e proyecto aki ya cu tin di cuminsa paga pero ainda esaki no a termina. No tin corespondencia riba tur e trabao cu a ser haci y con e 292 miyon a ser inverti. Un otro preocupacion tambe ta cu tin mas cu 500 fayo (mankementen) na e Green Corridor y no sa con leu e proyecto ta pa entrega esaki na Aruba.
Riba tur e punto y preguntanan aki lo delibera den e reunion di siman venidero, ya cu mester bin claridad pa caba. E minister actual di Infrastructura tin e trabao pa conduci e investigacion aki y trece na cla pa pueblo di Aruba sa kico lo para di e proyecto aki.