Child Helpline International di cual Fundacion Telefon pa Hubentud Aruba ta miembro ya for di aña 2004, a organisa conhuntamente cu UNICEF e proyecto LEAP. LEAP ta un programa global pa crea capacidad pa ataca explotacion sexual online di mucha. E obhetivo tawata pa revisa e capacidad di e liña di ayudo na mucha pa ataca y responde na explotacion sexual y abuso di mucha. E programa aki a ser sosteni pa e gobierno Britanico.
Den cuadro di e programa aki un estudio a ser haci bao di 17 pais di e 147 paisnan cu ta miembro di Child Helpline International. Di e 17 paisnan aki 9 a ser selecta basa ariba nan conocimento, experticio y experiencia den trata abuso online, violencia, abuso di mucha y explotacion online di mucha, pa por comparti nan recomendacionnan. Fundacion Telefon pa Hubentud Aruba tawata un di e 9 paisnan aki cu por a comparti nan conocimento, experticio y experiencia y recomenda esaki na otro liñanan di ayudo pa mucha. For di e estudio aki a sali un rapport cu por ser consulta door di tur liña di ayudo rond mundo.
Durante un encuentro na Asunción, Paraquay, Fundacion Telefon pa Hubentud Aruba a participa den un panel y a comparti su conocimento, experticio y experiencia.
E encuentro a ser organisa pa Child Helpline International, Secretario Nacional di Mucha y Adolecente di Paraguay, UNICEF Paraguay Y Plan International. Otro paisnan cu a asisti tawata: Canada, Estados Unidos, Guatemala, El Salvador, Republica Dominicana y Brazil.
Fundacion Telefon pa Hubentud Aruba a mustra por ehempel ariba e importancia di tin un bon colaboracion cu e compania nacional di telecomunicacion (Setar N.V.), Media, Oficina Central di Estadistica y otro fundacionnan/ instancianan. Otro practica cu a ser presenta ta e ‘Orea Special’ cu por conecta un mucha cu ta pasa den un of otro forma di abuso cu Bureau Sostenemi. Por ultimo a mustra ariba e importancia di concientisa parlamento ariba criminalisa cierto comportacionnan (‘Cyberbullying’, ‘Online grooming’ y ‘sexting’).
Fundacion Telefon pa Hubentud Aruba ta contento di por a participa na e proyecto aki y yuda desaroya e rapport aki cu por ser consulta door di tur liña di ayudo pa mucha rond mundo.