Home Police Caso grandi di actividadnan bancario ilicito y labamento di placa

Caso grandi di actividadnan bancario ilicito y labamento di placa

SHARE

Corte den prome instancia di Aruba a trata riba dialuna y diamars 22 y 23 di januari un caso penal contra cuatro persona, cu ta wordo sospecha di actividadnan bancario ilicito (ondergronds bankieren) y labamento di placa.

Den e caso aki, cu yama “Hamburg”, cuatro persona di descendencia Chines a wordo persigui, pa motibo cu nan tabata manda sumanan di placa desde Aruba pa China (principalmente) y di Aruba pa Sint Maarten y Anguilla riba gran escala.
Tin di e sumanan aki cu tabata relativamente chikito, pero frecuentemente tabata trata di sumanan hopi grandi mes.
Un di e personanan ta wordo alavez sospecha di tabata coordina transferencianan grandi di placa pa China y Aruba pa hende na Suriname, Colombia y Venezuela.
Alavez tabata cambia sumanan di placa riba gran escala. Segun Ministerio Publico, comisionnan illegal tabata wordo gana cu e transfercianan y e cambiamento di cen. Dos di e sospechosonan tabata inverti e ganashinan aki den (entre otro) inmobilario.

Ley ta stipula cu actividadnan bankero, transferencia di placa y cambio di placa por solamente wordo haci pa instancianan cu permiso of autorizacion di Banco Central di Aruba.
Esey ta pa ta crea un sistema di supervision riba trafico financiero, cu na esun banda ta garantiza proteccion di e consumidor contra instancianan financiero grandi, y na e otro banda ta boga pa garantiza integridad di e sistema financiero.
Di e manera aki ta evita cu e sistema financiero di Aruba por wordo malusa pa personanan criminal, cu ta dispone di placa di procedencia sospechoso of dudoso y ta busca pa laba cen.

E caso en cuestion di actividadnan bancario ilicito a sali na cla den un investigacion anterior di droga, den cual investigadornan a wak con e sospechosonan den e investigacion ey, tabata haci uso di servicionan di un di e sospechosonan den e caso Hamburg.
E sospechoso aki tabata cambia placa pa e sospechosonan den e investigacion di droga of tabata manda cen afo pa nan.
Tambe a keda constata cu placa cash tabata wordo manda pa exterior, sin cu tabata haci denuncia na Aduana manera ley ta prescribi.
E ora a cuminza un investigacion contra e sospechoso aki. RST tabata encarga, bao guia di Ministerio Publico. E investigacion a dura un aña y mey.

E investigacion Hamburg a mustra cu dos di e sospechosonan tabata hiba actividadnan bancario ilicito extenso y transnacional.
Casi tur siman y pa periodo largo tabata manda sumanan di entre 500 Dollar y 100.000 Dollar pa exterior.
Tabata cobra comisionnan di 5%, pero tin biaha te 8%.
Dor di esey, asina ta e sospecho, tabata genera entredanan illegal den cash hopi grandi.
Den cuadro di e investigacion a tuma sumanan den cash grandi den beslag durante huiszoekingnan.

Cu e entradanan aki tabata cumpra y paga (entre otro) activonan fiho.
Ora tabata paga terceronan, tabata paga e terceronan aki parcialmente den cash, y despues e terceronan tabata pone e placa aki back riba cuentanan bancario di e sospechoso.
Siguientemente e activonan fiho tabata wordo paga desde e cuentanan bancario ey.
Asina tabata aparenta cu e cen tabata wordo presta di e terceronan, mientras cu en realidad, e cen tabata di e sospechosonan mes.
Segun Ministerio Publico, ta pa e razon aki cu, banda di e sospecho di actividadnan bancario ilicito, a bin tambe e sospecho di labamento di placa.

A exigi castigonan di prison y multanan grandi contra tur e sospechosonan. Huez lo dicta sentencia riba 6 di maart 2018.

Ademas Ministerio Publico tin planea pa traha un informe pa gobierno, den cual e problematica di actividadnan bancario ilicito lo wordo describi y lo bin cu cuadronan dentro di cual e problematica aki por wordo combati structuralmente.