Un mainta hopi interactivo y informativo
For di e momento cu e fraccion di MEP a tuma e responsabilidad como Parlamentario, mesora a cuminsa enfoca riba e aspecto social, ya cu tabatin tur indicacion cu esaki ta den un crisis total.
Diamars ultimo parti di e fraccion di MEP a haci un bishita informativo y interactivo na Stichting Imelda Hof, p’asina haya un miho bista tocante nan maneho-, necesidad- y inkietudnan. Mester remarca cu nos a keda impresiona cu e tremendo trabou cu nan ta haciendo, a pesar di tin varios aña cu no ta ricibi e apoyo y oido necesario pa por funciona miho ainda. E mainta a cana hopi fructifero y directora Nathalie Hernandes, hunto cu Dennis Campbell, coordinador pedagogico, nan a elabora y contesta tur nos preguntanan. Loke ta resalta ta e falta di un data base, pa atrobe por funciona mas structura, specialmente mirando cu ultimamente ta hayando mucha for di e mesun circulo familiar. Durante e ultimo 7 añanan Imelda Hof tin un promedio di 32 mucha, for di 6 – 18 aña, unda cu e parti emocional ta di sumo importancia pa trata y ta boga pa tin un psicologo den cas, p’asina por traha mas efectivo, en bes di laga e muchanan warda 8 luna prome cu haya ayudo psicologico. Tambe a papia tocante e cambionan for di 2010, unda cu Imelda Hof a cuminsa draai 24/7, pues incluyendo weekend, unda cu a cuminsa cu 2 mucha so y awo tin un averahe di 15-18 mucha. E necesidad di tin mas trahado bon ekipa y studia den cas ta un mester, ya cu e problemanan social ta escalando y ta birando mas desafiante y mas cu claro ta exigi hopi mas conocemento, experticio y profesionalismo pa anda cu e muchanan.
Den nos rol como parlamentario, Imelda Hof por ta sigur cu nos lo tin nan necesidad- y preocupacionnan bon na mente y pa logra tambe haya e fondonan necesario pa por traha na bienestar di nos muchanan, cu ta nos futuro.