Home » Riu Palace Antillas a tene fundraising brunch pa yuda cuida bestianan den necesidad

Riu Palace Antillas a tene fundraising brunch pa yuda cuida bestianan den necesidad

by Admin
0 comment 67 views

New Life for Paws Rescue Foundation ta yuda cuida cacho y pushinan den necesidad

ORANJESTAD, Aruba: Riu Palace Antillas a tene un fundraising brunch pa New Life for Paws Rescue Foundation. Natalya Yermak, fundado di e fundacion na Aruba, tabata contento cu e evento aki di cual el a indica “di tabata increibel y tabata fenomenal di a tene e evento bunita aki. Tabata un placer di a mira e generosidad di Riu team di a haci donacion di nan tempo y esfuerso pa yuda nos sigui traha cu tur cacho y pushi di Aruba cu mester atencion”.

 

E idea pa tene e fundraising brunch a bin despues cu e team di Riu Palace Antillas a mira e fundado di e fundacion rescata cacho y pushi diariamente. E hotel a dicidi di organisa un evento, unda a trece hunto hendenan cu ta stima bestia y ta cuida nan mesun puppynan, pa duna visibilidad na Natalya Yermak y su trabou y yuda e fundacion pa haya fondo pa sigui cu e trabou.

 

Representante di Riu Palace Antillas, Dany Nieto, a informa cu Natalya Yermak ta duna 100% di su mes pa sigura cu e criaturanan ta bon cuida. E trabou cu e ta haci a mishi cu curasonnan na Riu Palace Antillas y asina ambos hotel di Riu, Riu Palace Antillas y Riu Palace Aruba, a dicidi di contribui na e comunidad di Aruba colaborando cu NGO. E gerencia di ambos hotel ta amante di bestia. “Nos kier a gradici tur hende na Aruba pa participa y tuma nan tempo pa bin na nos brunch y haci donacion”.

 

New Life for Paws Rescue Foundation ta un fundacion cu ta salba bestianan di Aruba. Nan ta gara pushi y cachonan riba caya, den “kill cage” y tin biaha for di famianan cu a bandona nan. Natalya Yermak ta dedicando 24 ora di su bida pa yuda e bestianan: e ta sterilisa nan y ta duna nan di come durante oranan di mainta y anochi. Pa yuda e puppynan, e ta duna nan di come via boter y ta cuida nan. E fundacion ta cuida e puppynan cu tin problema di cuero y cu tin diferente problema di salud. Tambe e fundacion ta yuda puppynan na veterinario, na momento cu e veterinario bisa nan cu e puppynan no lo salba y e fundacion nunca ta rindi, cual nan ta duna tur bestia un di dos oportunidad pa biba.

 

Pa haci tur esaki, e fundacion mester mas ayudo asina ta evento manera esaki por yuda crea consciencia di e importancia di e trabou cu nan ta haciendo y trece mas atencion y recurso p’e fundacion. E factura di veterinario di New Life for Paws Rescue Foundation ta hopi halto, pasobra e fundado ta tuma yamadanan durante oranan di mainta y anochi pa busca cacho of pushi y ta hiba nan na veterinario di cual tur gasto ta sali for di e donacion pa paga e facturanan.

 

Tur hende por yuda e fundacion cu donacion of kico cu nan por y haci e donacion direct na e factura di Animal Health Veterinary, cual ta situa banda di hospital. E fundado di e fundacion no kier ricibi placa cash den su man, pero pa paga directamente na e veterinario unda tur cos ta bay pa cacho y pushi, pa bestianan di Aruba.

 

Durante e fundraising brunch nan a logra recauda mas di 2000 florin p’e fundacion. Tur hende presente a disfruta nan mes y tabatin e oportunidad di saca potret na e backdrop cu print di pia di cacho di Riu Palace Antillas. Tur hende tabata orguyoso di a yuda e fundacion cu nan meta di yuda bestia. Na final di e fundraising brunch, tabatin e raffle cual ganado a gana un day pass na Riu Palace Antillas.

 

Riu

Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “All Inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

 

Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio