Home Politics Parlamentario Edgard Vrolijk di MEP: Durante 2009 pa 2017 no a construi...

Parlamentario Edgard Vrolijk di MEP: Durante 2009 pa 2017 no a construi ningun parke deportivo y recreativo

SHARE

Durante e conferencia di prensa di fraccion di MEP, parlamentario Edgard Vrolijk a papia tambe riba e planificacion integral pa deporte, ya cu por haci inversionnan grandi den deporte, pero mester planifica y tambe mester sa con ta cuida e inversionnan aki. Segun sr. Vrolijk, ora wak e periodo di 2009-2017 mester constata cu e canchanan deportivo y e luznan ta den hopi mal estado. E ta puntra su mes, ta kico a ser haci? Hecho ta cu e minister den e gobierno anterior a yega di declara cu nan lo a haya mas placa di Lotto y cu e ta hopi orguyoso di esey, pero locual a bin afo ta net nada, ya cu contrario na e periodo di 2001-2009 caminda hopi parke deportivo a ser construi, durante 2009-2017 no a construi ningun parke deportivo y recreativo mas. Esaki ta di lamenta, ya cu hopi mucha ora cu scol caba merdia of ora cu nan no tin nada di haci lo por haci uzo di e parkenan aki.

Canchanan den mal estado
Segun e parlamentario, mester haci e parkenan aki multifuncional cu te hasta por duna les anochi na entre otro e muchanan cu a drop out y cu esaki por conduci tambe na mehoracion di e bario.Tambe mester constata cu e canchanan deportivo caminda e muchanan ta hunga ta den hopi mal estado. No tin material pa e coachnan por traha cu e muchanan. Mester yega na planificacion optimal pa asina por trata di mehora e producto di deporte. Tambe mester busca alternativanan, por ehempel mediante ampliacion di e cantidad di Lotto, pero di parti di gobierno lo mester bin cu un plan integral, wak con por pone placa y p’asina cuminsa na planifica cu cosnan chikito pa mehora nos deporte.

Mehoracion curiculo deportivo
Principalmente coleganan docente di sr. Vrolijk ta hopi preocupa con ta bay mehora e curiculo deportivo cu na e momento aki ta deficiente. Sin duda cu mayoria di e muchanan cu ta participa caba na deportenan pafo di scol tin cierto beneficionan, pero locual tin paden no ta produci deportista.
Finalmente sr. Vrolijk a trece padilanti cu e Weganan Interinsular entre e islanan ABC cu den pasado tabata hopi popular mester wordo stimula atrobe y esaki entre otro via scol. Un apelacion ta ser haci na minister di Deporte pa wak con por stimula esaki y alabes mehora e curiculo deportivo, stimula nos hobennan pa haci mas deporte y asina ey mehora e parti di deporte y tambe tene e muchanan pafo di caya despues di scol.