Parlamentario Alan Howell: “Mi tin pleno confiansa cu Minister di Husticia lo tuma e mihor decision”

Parlamentario di partido POR, Alan Howell ta indica cu tur hende ta pendiente di e decision cu Minister di Husticia lo tuma e siman aki cu tin di haber cu nos Cuerpo Policial.
Minister di Husticia lo mester tuma un decision den ki rumbo nos Cuerpo Policial lo mester sigui bay y ken lo tuma e timon over. E Korps Chef actual a notifica cu e no ta desea di sigui maneha e cuerpo di polis y ta cla pa otro reto.
Parlamentario Alan Howell sa y ta compronde cu esaki no ta un situacion facil y tampoco un decision facil, pero e ta sigur cu nos Minister di Husticia lo sa di bin cu e mihor plan pa cu nos Cuerpo.
Cuerpo Policial mester haya su paz y trankilidad bek mas lihe cu ta posibel pa asina tur polis por sigui focus riba e meta cardinal cu ta; mantene ordo, respet, trankilidad y seguridad nacional.
Como representante di pueblo Parlamentario Alan Howell lo sigui vigila e proceso aki di cerca.