Home Local DURANTE RUEDA DI PRENSA A ENFATISA HECHO CU: DEN 2017 A.T.A....

DURANTE RUEDA DI PRENSA A ENFATISA HECHO CU: DEN 2017 A.T.A. A SIGUI DUNA PRIORIDAD NA ‘GOOD CORPORATE GOVERNANCE’

SHARE

ORANJESTAD – Como e autoridad di turismo na Aruba, A.T.A. ta estricto den su maneho. Gerencia ta laga diferente compania independiente haci auditoria riba base mensual y anual. Esaki ta tuma luga ya for di 2011, na momento cu Oficina di Turismo a bira independiente y orguyosamente por bisa cu tur aña ta cumpli debidamente cu entrega di entre otro e Rapport Annual, cu ta inclui resumen di resultadonan y di trabou haci, como tambe e relato financiero cu su respectivo ‘goedkeurende verklaring.’ E proceso di auditoria na A.T.A. a inclui tambe un ‘dossier review’ di Centrale Accountants Dienst na 2016. Esaki fuera di e auditoria financiero mensual y anual conduci pa companianan di accounting independiente. E rapport annual ta wordo entrega formalmente na Minister di Turismo. Prome cu Minister aproba e rapport, ta manda esaki pa Parlamento di Aruba cu tin un periodo di 10 dia pa haci eventual pregunta.

Conforme ley tin otro momento clave pa A.T.A.; fuera di entrega di Rapport Annual, entrega di e Presupuesto Annual ta instrumental den e maneho responsabel cu ta spera di A.T.A.

Na 2017, pa di 7 biaha, A.T.A. a haci entrega di e dos documentonan clave aki, conforme ley aplicabel pa A.T.A.
Ta ehercicionan extenso, pero di sumo importancia pa un maneho conforme ley y conforme practica di ‘Good Corporate Governance’.

E control riba maneho y actividadnan di e organisacion ta exigencianan cu ta pa gran parti hancra den ley. Un di e exigencianan ta cu Hunta di Supervision di A.T.A. ta supervisa e maneho di gerencia. Hunto cu otro aspectonan, ta percura cu e instituto ta wordo maneha den un forma transparente y responsabel. Maneho tambe ta encera cu ta identifica areanan di mehoracion y cu ta desaroya plannan strategico. A.T.A. ta pone hopi enfasis riba e fortalecemento di su maneho, actividadnan y accionnan. Esaki tumando na cuenta cu e ta opera den un esfera hopi dinamico.

Entrada principal di Oficina di Turismo ta e ‘Tourism Levy’ cu Gobierno a designa y anteriormente tabata yama ‘Room Tax.’ Fuera di esaki, A.T.A. ta ricibi fondonan adicional for di september 2012 atrabes di e ‘Travel Promotion Levy’ maneha directamente door di e oficina mes den colaboracion estrecho cu IATA (International Air Transport Association). E entrada aki ta bay bek pa cubri e gastonan haci den promocion di Aruba y tambe den e desaroyo di nos producto turistico. Ademas, A.T.A. su entrada menos su gastonan, pues su resultado ‘netto’ ta designa pa Gobierno di Aruba, for di 2015.

Pa loke ta trata aña 2017, Aruba su turismo en general a cera cu un crecemento di 9.1% si exclui e mercado fragil, y cu sigur a trece su retonan, di Venezuela. Nos mercado principal, esta e mercado Mericano a cera cu un crecemento di 10.7%. Esaki ta e resultado di esfuersonan adicional cu a wordo haci durante e aña pa cu mercadeo den mercado Mericano. E frutonan di e ahuste strategico aki ta wordo refleha no solamente den e cantidad di bishitante, pero tambe den e grado di ocupacion y rendimento (ganashi) pa hotelnan, cual conforme resultadonan reporta pa AHATA pa 2017 a crece cu 10.8%.

Pa 2018 A.T.A. y su ekipo ta determina pa sigui traha duro, cu positivismo y basa riba sigur e cuadro di maneho conforme ‘Good Corporate Governance’.