Minister di Turismo, Salubridad Publico y Deporte Sr. Dangui Oduber conhuntamente cu Minister di Infrastructura y Medio ambiente Sr. Otmar Oduber a reuni cu APA pa ricibi tur e ultimo desaroyonan di e Masterplan “Waf Oranjestad”.
E intencion tras di e presentacion tabata ta pa duna un update di e Masterplan na Gobierno. Actualmente e proyecto ta den e etapa na unda Gobierno tin cu bai incorpora su vision pa cu e desaroyo na waf di Oranjestad.
E Masterplan aki ta un proyecto a largo plaso di mas o menos 15 pa 20 aña pa completa. Pa tipo di proyectonan di e magnitud aki e comienso ta importante, esta un bon etapa inicial. Durante e añanan venidero lo ta bai tin hopi desaroyonan positivo den “Waf Oranjestad” hunto cu loke tin existente caba den e desaroyo di nos Caya grandi. Esaki ta loke nos ta yama un senergia.
Durante e reunion aki a trata tambe desaroyonan di atraccionnan cu meta di fascinacion, ta papia di atraccionnan cu lo ta unico, diferente y original pa atrae nos turistanan y tambe nos hendenan local. Gobierno kier desaroya y inverti den atraccionnan completamente diferente y nunca antes bisto na Aruba. Por ultimo a demostra tambe e desaroyonan pa locual ta e sitio cu e barconan crusero ta staciona actualmente. Gobierno di Aruba lo incorpora su vision na unda cu APA lo hasi e cambio nan necesario na e proyecto aki pa por brinda Aruba algo unico na unda cada cuidadano riba nos isla por ta orguyoso di dje.