Despues di a wordo informa door di Minister President Sra. Mr. Evelyn Wever-Croes pa loke ta e situacion di Venezuela, mi a haci un bishita na Bureau Rampenbestrijding pa haña mas informacion tocante entre otro e preparacion den e caso cu un crisis presenta.
Sr. Hermans, hefe interino di Bureau Rampenbestrijding, a duna informacion extenso di e preparacion nan cu ya ta andando pa algun tempo caba y tambe a comenta riba e desafionan. E departamento tin como meta pa transforma for di uno cu ta enfoca riba crisis pa uno cu ta enfoca riba “risico beheersing”.
Pa loke ta preparacion nan specifico den cuadro di crisis, e maneho ta stipula y tur planes nan ta cla. Den pasado esakinan a yega di wordo “getraind” tambe cu tur departamentonan en cuestion, mi a bin compronde. Mirando e escala chikito di nos pais, tin diferente contacto cu paisnan den nos region, cu por brinda yudansa tambe. Ta papia di un crisis secundario tambe na momento cu yega na un escalacion, esaki mirando e escala chikito di nos pais y e presion cu un situacion asina lo pone riba nos departamentonan cu tin recurso limita.
E proceso completo, si yega na un escalacion, ta uno di 6 luna, y ta consisti di 3 fase. Na prome instante lo registra tur esnan cu yega Aruba, incluyendo e parti medico. Despues lo percura pa e prome necesidadnan pa e personanan aki y por ultimo lo mester dicidi unda nan lo bay, e asina yama “resettlement”, cual ta un asunto di reino.
Pa full e proceso aki por cana mas eficiente posibel mester di recursonan pero tambe mester adapta diferente ley, cu segun sr. Hermans, ta impedi eficiencia pa loke ta maneho y combatimiento di crisis en general.
Mi a yega na un palabracion cu sr. Hermans cu mi persona den transcurso di otro siman lo ricibi un “overzicht” di e leynan cu den su concepto mester wordo adapta, pa asina parlamento por evalua esaki y di nos banda percura pa e cambio nan necesario den ley tuma lugar.