Diadomingo mainta Prome Minister di nos Pais a ricibi Prins y Pancho di Carnaval 64 na Bestuurskantoor pa asina ricibi e decreto di Carnaval 64 for di man di Prins y Pancho y tambe pa entrega e Yabi di Gobernacion na e mahestadnan di Carnaval 64.
Prins Bon y Pancho laaf a lesa e decreto di e maneho cu nan lo desea di hiba y a haya ful atencion di nos Prome Minister Evelyn Wever-Croes kende a felicita nan y a desea nan exito den nan tarea pa guia paradanan di Carnaval 64.
Como tradicion di nos dushi Carnaval, e Machete di Carnaval a wordo entrega na Prins y Pancho Infantil Gusta Hari pa asina nan defende Carnaval di mucha y habri paradanan infantil. E spada di Carnaval 64 a wordo entrega na Prins y Pancho Hubenil, Prins Des y Pancho Confia como defensornan di Carnaval pa hubentud. Y e Yabi di Gobernacion a wordo entrega na Prins Bon y Pacho Laaf.
Dilanti di tur e mahestadnan di Carnaval 64 presente, representantenan di SMAC y e publico carnavalesco, e prome mandatario a duna un discurso pa desea Aruba henter un dushi temporada di Caraval y a gradici tur esnan cu ta tuma nan tempo pa engrandece e fiesta cultural mas grandi di nos pais, esta Carnaval.
Como un toke special di e dia aki, Prome Minister a invita e mahestadnan di Carnaval 64 pa pasa den e sala di reunion unda cu e mandatario a regala nan un bunita pin pa asina nan tambe por keda cu un bunita recuerdo di nan bishita.
Aruba, ban goza di nos Carnaval na un manera sano.