Home Politics Parlamentario Endy Croes di MEP: Otro preocupacion grandi di gobierno ta AZV.

Parlamentario Endy Croes di MEP: Otro preocupacion grandi di gobierno ta AZV.

SHARE

Mester studia esaki bon y trece cambionan den ley na bienestar general

Di acuerdo cu parlamentario Endy Croes otro instancia cu mester hopi atencion ta AZV(Algemene Ziektekosten Verzekering). No ta di awor esaki ta un topico cayente cu nos mester debati riba dje enbes di keda schuif e responsabilidad pa otro generacion. Pa duna un ehempel, si tuma nota di e patronchi di Landsbijdrage esta e placa cu gobierno di acuerdo cu ley mester inyecta pa asina cubri e diferencia pa AZV por draai ta como lo siguiente. Na 2011 gobierno a inyecta 123 miyon, na 2012 esaki tabata 118 miyon, na 2013 un otro 122 miyon, na 2014 esaki a suma na 120 miyon. Desde 2015 cu a introduci e BAZV esaki a baha den 2015 na 53 miyon florin. Pero nos ta tumando nota cu gastonan operacional di AZV, esta pa paga empleadonan a aumenta den mesun periodo aki di 16 miyon pa 18.3 miyon.

 

Carga awa hiba lama                                                         

Otro cos cu a hala nos atencion ta cu apesar di a introduci e BAZV pa asina reduci e suma cu gobierno lo mester inyecta anualmente, basa riba extrapolatie esaki lo aumenta atrobe den añanan nos dilanti y atrobe lo alcansa 100 miyon. Parlamentario Endy Croes ta splica cu esaki ta un maneho di carga awa hiba lama. Si ningun hende no haci nada e “MONSTER” AZV lo crash den futuro pisando demasiado riba caha di gobierno. Nos a drenta gobernacion cu e lema Sin Miedo y ta di e manera aki nos lo mester atende cu issuenan cu ta un menasa pa cualkier gobierno.  Nos mester debati kico nos mester haci hunto pa controla esaki na un situacion manehabel y duradero pa nos futuro generacionnan. Algun punto di atencion como ehempel. Un studiante di Aruba momento cu e bay Hulanda bay studia promer cos cu e mester regla ta su seguro. Pues e mester paga su propio seguro pa e ta cubri durante e añanan cu e ta na Hulanda. Parlamentario Endy Croes ta duna mas ehempel di su propio experencia. Su mesun yiu a bay studia na Merca y manera el a yega Merca prome cu e cuminsa school e mester demostra un seguro cu E como mayor mester cumpra prome cu e yiu wordo permiti pa asisti na su prome les.

 

Un AZV duradero                                                                   

E pregunta ta lanta e ora, dicon na Aruba manera un persona inscribi na Censo di acuerdo cu e ley actual e ta haya tur derecho riba tur sorto di tratamento? Ta tempo pa nos cuminsa papia riba esaki y asina haci cambionan necesario mescos cu na tur parti di mundo. Un persona cu bin traha aki pa yuda nos pais bay dilanti ta bon bini pero e doño di trabao mester cumpra un seguro priva p’e cu ta cubri tur cos  igual cu AZV. Esaki ta solamente un ehempel y asina tin basta temanan cu lo mester wordo discuti pa mehoracion di un AZV duradero. E cambionan aki lo mester bin hunto cu otro tipo di cambionan den ley pa asina AZV por cubri tambe personanan cu a accidenta y pa un of otro motibo no por a wordo manda afor manera ta e caso recien di Kyrenne Croes. Parlamentario Endy Croes ta termina bisando cu tin hopi trabao riba diferente tereno pero tin trabaonan cu tin prioridad y esaki ta un di nan. Dialuna lo sali un serie di pregunta pa Minister Dangui Oduber al respecto y como parlamentario e lo percura pa ranca esaki dilanti.