Home » Miembronan di AHATA contento cu informacion ricibi durante e tayer di impuesto

Miembronan di AHATA contento cu informacion ricibi durante e tayer di impuesto

by Admin
0 comment 60 views

PwC a suministra hopi informacion di impuesto den e industria hotelero

 

ORANJESTAD, Aruba – Aruba Hotel and Tourism Association (AHATA) a organisa un tayer di “Keeping up with Taxes” pa ehecutivonan di e departamentonan di Recurso Humano, Administracion, Operations y Financia di e miembronan di AHATA. Pricewaterhousecoopers (PwC) a presenta na e tayer aki unda cu e participantenan a ricibi hopi informacion entre otro riba impuesto den e sector di turismo. E oradornan di PwC tabata Hans Ruiter, Tax Partner, Jourainne Wever, Manager Tax, Melina Rangel, Consulant Tax y Anushka Lew Jen Tai, Senior Tax Manager.

 

Jim Hepple, Acting CEO of AHATA, a expresa cu nan gusta haci tipo di presentacion asina aki cada luna. E tayer aki tabata specificamente over di impuesto, kico ta pasando cu impuesto den industria hotelero. E partner PwC a yuda AHATA cu e tayer aki, pasobra nan tin hopi experticio den e area aki. “Nan a ofrece pa duna e presentacion aki pa nos”. Bo por a mira con interesa nos miembronan tabata sigui e presentacionnan”, asina el a indica. Hopi miembro a participa y esaki tabata algo importante.

 

Anushka Lew Jen Tai, Senior Tax Manager a elabora cu nan a papia riba posibel reformanan fiscal cu por tuma luga pa motibo cu tin un gobierno nobo. Tambe a papia riba cambionan cu a tuma luga riba e tereno di impuesto door di e gobierno anterior y tambe desaroyonan cu a tuma luga por ehempel despues di veredictonan di corte riba tereno di impuesto. Pa finalisa a toca e tema di responsabilidad di debenan di impuesto y primanan social pa entre otro directornan, contratistanan y tercer partidonan cu ta contrata personal. PwC a informa e miembronan di AHATA riba esakinan, pero tambe di nan experiencia cu nan tin diariamente.

 

E feedback cu PwC a ricibi for di e participantenan tabata hopi positivo. “E tema di impuesto semper no ta uno ‘amusing’. Hopi hende no ta haya e tema interesante kisas”, asina Anushka Lew Jen Tai a expresa. Pero den e caso aki, mayoria di e participantenan tabata interactivo unda cu a haci preguntanan. Pa PwC e tayer aki a bay bon.

 

Despues di e presentacion AHATA su miembronan a bisa cu nan a haya e tayer hopi informativo y interesante. AHATA tabata contento pa esaki. Ricardo Vrolijk, Assistant Financial Controller, a haya cu e presentacion tabata uno hopi informativo. Tin varios punto den impuesto cu e miembronan mester tene consideracion cu nan, specialmente e parti di hotel. “Nos tin e parti di precario belasting, cu ta algo nobo y kico a haci cun’e”, asina Ricardo Vrolijk a elabora. E informacion cu e participantenan a ricibi di PwC tabata un guia na con nan mester prepara nan mes pa futuro. Pa basta aña Ricardo Vrolijk ta traha cu PwC y ta implementa varios sugerencia, pasobra nan tin experticio den e ramo di impuesto.

 

Marriott Vacation Club tabata presente na e tayer y Natasia Dragt, Human Resources Manager di e resort, a expresa cu e tayer tabata hopi interesante pa nan. Durante e tayer nan a ricibi hopi punto cu nan por uza. Tambe cosnan cu nan no tabata sa, nan por mira si esaki ta algo cu por implementa den nan trabou. Natasia Dragt a expresa cu pa nan implementa e puntonan aki, nan lo tuma mas contacto cu PwC pa asina haya puntonan mas directo riba cosnan specifico manera e regulacion nobo di “expat”. Tambe tin e “Third party liability” di cual nan por “tight” esaki un tiki mas, pero tin algun otro cos cu nan ta bay atende cun’e.

 

Despues di e tayer e miembronan di AHATA a disfruta di e recepcion na Tierra del Sol, unda cu nan por a amplia nan “netwerk” cu otro. AHATA ta gradici PwC pa duna e tayer y e miembronan pa participa.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio