Dia di Betico a wordo celebra en grande diahuebs ultimo. Den comparacion cu añanan anterior por a nota un cambio grandi pa cu celebracion di dia di Betico. Parlamentarionan di Fraccion di MEP a sali dia 24 di januari pa haci bishita na diferente school pa asina conta e muchanan e storia real di Libertador Betico Croes. Mester bisa cu esaki sigur a acapara un acogida grandi y por a compronde tanto di Prome Minister Sra. Evelyn Wever Croes y Minister di Finansa, Economia y Cultura Sra. Xiomara Ruiz Maduro cu lo tin plannan mucho mas grandi den preparacion pa 2019 unda lo hiba historia di Betico Croes como les na schoolnan y asina percura pa nos muchanan educa nan mes riba e historia di e luchador incansabel cu a logra Status Aparte pa Aruba.
Parlamentarionan Endy Croes, Shailiny Tromp Lee y Hendrick Tevreden a bishita Plaza Status Aparte na crusada na Sta Cruz y a topa eynan cu School Caiquetio cual school ta un school di enseñansa special. School Caiquetio a hiba un total di 9 grupo di alumno di edad 6 pa 14 aña na Cas di Betico su mayornan cual cas ta wordo maneha pa Fundacion Betico Croes pa asina por aprecia historia di nos Libertador.
School Caiquetio ta un di e schoolnan na Aruba kendenan riba propio iniciativa ta celebra dia di Betico en grande. Meneer Marlon Vrolijk hunto cu Juffrouw Misha Hart ta esnan encarga pa organisa e actividad di 24 di januari y ta haci tour rond di Aruba cu e muchanan hibando nan diferente lugar special. E muchanan aki a gosa masha hopi y hunto cu Waarnemend Hoofd Sra. Mary Koeiman y demas juffrouw y meneernan Caluda Paulina, Iris Agunbero, Deanne de Mei, Anecy Toussaint, Kathleen Pastor, Vanessa Guttierez, Mila Thijzen, Sherry Hasham, Roseanne Croes, Elizangela Farro, Joseph Romero, Shahayra Willems, Mandy Angela, Jefferson Gomez, Silvienne Winterdaal ta entre esnan cu a percura pa acompaña tur e 90 muchanan pa nan pasa un dia ameno siñando ken ta Betico. Danki na bon cooperacion di Hoofd di school Carolina Paesch.
Un cancion cu a yama atencion di e parlamentarionan ta momento cu ful e school a canta e cancion “Betico a percura pa e bandera” composita pa Robert Reeberg. Un cancion masha masha bunita y espectacular pa scucha tur e muchanan canta e cantica aki y tur tabata sa e letranan. Danki na Gloria Croes y Maikito Croes di Fundacion Betico Croes kendenan a brinda un rondleiding den cas di Betico su mayornan. Pabien na school Caiquetio.