Ariba e dia aki, anos como mayor, educador y Gobierno en particular, tin e deber di pone enfasis riba e logronan y, muy en especial, duna atencion na e lucha cu e Arkitecto y realisador di nos Status Aparte a hiba, pa awe nos ta liber den nos propio cas.
Betico tabata un politico cu semper tabata corda riba su pueblo na prome lugar. Un homber orguyoso di tabata yiu di e pueblo aki. Cu un don special pa destila e anhelo di e pueblo pa libertad na diferente manera cu un solo meta: realisacion di esaki!
Betico a keda golpia, cera y tira pa e solo motibo cu e la hiba lidersago di e partido cu a hiba e lucha di e pueblo aki pa libertad den e fase di realisacion esta Movimiento Electoral di Pueblo. E tabata un lucha largo, un lucha cu a laga su marcanan atras, un lucha cu a laga su cicatrisnan atras y logronan grandi atrás. Mi ta convenci cu loke tin na documentacion, ta mas cu suficiente pa mantene e historia di su logro y lucha berdadero bibo. Mi ta contento cu Gobierno a lanta un comision cu lo tin como tarea pa percura pa tin material educativo pa drenta scol. T’asina so nos por percura pa su legado keda salvaguardia y tras
Betico semper a carga fe y confiansa den e mentalidad y karakter di e pueblo aki y tabata consciente cu hunto y uni bo ta logra! Betico tabata sa cu pa logra cu e pueblo ta para hunto cune den e lucha, e mester bin cu simbolonan cu lo crea union y lo hisa e sentimentonan di patriotismo. Pa es motibo aki e la percura pa introduci un himno y un bandera. Alabes a duna hopi atencion na cultura di Aruba y a percura pa bin cu un organo pa percura pa maneho y cuido di esaki. Door di crea union den pueblo, no obstante diferencianan di opinion riba otro terenonan, Aruba completo a para pa e lucha pa nos libertad. Un pueblo cu un meta en comun, un meta nacional, libertad y mayor felicidad pa un y tur y e futuro generacion.
Dia di Betico ta un refleho di e strategia cu Betico a usa pa logra su meta. Dicon mi ta bisa esey? Dia di Betico famianan ta subi caminda pa celebra. E ta un dia di fiesta nacional. Un dia cu ta crea union, patriotismo, orguyo y asina mi por sigui menciona. Diferencianan di opinion ta keda hala un banda pa rindi honor na Nos Libertador. Un dia cu mi ta convenci ta haci Nos Libertador, aya, na cielo, .
Riba Dia di Betico nos mester bati riba nos pecho, nos mester alsa nos voz y bisa:
‘Danki na dje: nos tin nos propio himno y bandera, nos Status Aparte, nos Parlamento/Gobierno, nos moneda, nos Banco Central………y nos ta baas den nos mesun cas!
Dia 25 di januari venidero, Dia di Betico, laga nos tur hisa nos bandera, bisti bo tshirt y asisti na e diferente actividadnan riba nos isla. Lo tin e acto protocolar parti mainta na Plaza Betico y e manifestación parti anochi cu tambe lo ta riba plaza.
Pabien Aruba! Ban gosa di nos Dia di Betico!