Fraccion di POR ta contento y ta sostene e decision di Minister di Infrastuctura y otro ministernan y departamentonan pa bin cu un task force pa ruim op de boel banda di lama.
Alan Howell ta bisa cu tur hende sa cu pa añanan tabatin un ‘free for all’ canto di lama cu bringamento y bendemento di droga den dia cla. Pesey a yega ora pa pone ordo y bisa ta basta.
“Nos por a tuma nota cu nos Minister di Infrastructura, conhuntamente cu Minister di Husticia, Minister di Turismo y Minister di Transporte a forma un Task Force encarga pa actua y restablece ordo riba nos beachnan. Ya caba den fin di siman nos por a mira su frutonan unda cu a cuminsa ruim op de boel cant’i lama”, Howell a indica y a agrega cu fraccion di POR lo sigui sostene e tipo di accionnan aki y ta opine cu e tipo di task forcenan aki mester bin den barionan tambe.
Fraccion di POR lo keda monitor y duna su input unda cu por yuda dunando su sosten na e Gobierno actual pa haci cosnan bon, trece siguridad manera cu a priminti den campaña.