Parlamentario Endy Croes di MEP: Ta pidi pueblo pa hisa bandera y sali celebra dia di Betico den grandi dia 25 di januari

Diahuebs awor nos ta celebra dia di Betico. Betico Croes, un homber humilde di Sta Cruz kende a lanta su propio partido Movimiento Electoral di Pueblo MEP usando e vehiculo aki pa asina lucha y cristalisa Aruba su Status Aparte tan anhela. Betico a percura pa Aruba haya su Himno y Bandera. Betico a percura pa unifica e pueblo aki. Betico cu un carisma unico y curason grandi a siña henter su pueblo norma y balornan humano cual a traduci nan mes den un stimacion incondicional pa Betico como persona. Betico tabata tin dichonan cu hamas lo por wordo lubida manera “si mi cay na caminda boso hamas laga e causa un banda pero gara e bandera y sigui cu e lucha”. Despues di tanto aña di lucha Aruba a logra drenta su Status Aparte dia 1 di januari 1986. Betico lamentablemente ta accidenta na Sta Cruz 3 algun ora prome cu mey anochi di 31 di december 1985 y asina nunca a biba pa mira su propio logro y meritonan drenta na vigor. Historia y bida tin facetanan cu nos como sernan humano nunca lo compronde. Danki na e lucha tenaz aki di Betico y henter e elenco di MEP den añanan 70 y 80 Aruba a wordo libera di Antiyas y a conoce su propio gobierno. Betico lo keda den memoria di henter nos pueblo. Hopi ta esnan cu awe ainda ta yora nan lider maximo. Aruba, ban celebra Dia di Betico diahuebs awor 25 di januari, tanto mainta na Plaza Libertador Croes, na Cede di MEP y anochi un bes mas na Plaza Betico Croes. Laga nos hisa nos bandera y sali core rond y bishita tur e actividadnan rond Aruba.