Home Politics Parlamentario Endy Croes di MEP: Nos mester enfoca y probecha pa atrae...

Parlamentario Endy Croes di MEP: Nos mester enfoca y probecha pa atrae y desaroya turismo deportivo

SHARE

Segun Parlamentario Endy Croes ta importante y apropia pa Gobierno desaroya tambe otro tipo di turismo manera turismo Deportivo. Nos tin e infrastructura ‘in place’ pa turismo y mester probecha pa desaroya mas areanan den esaki. Turismo medico tambe ta un otro oportunidad cu un inversion of colaboracion cu cualkier instancia internacional pa brinda Aruba un specialismo den un of mas ramo. Continuando den area deportivo esaki ta un area cu ta creciendo. Segun estadistica di expertonan den e ramo aki estudionan recien den 2017 ta ilustra cu tin alrededor di 12 miyon turista deportivo ta biaha pa aña. Esaki ta representa 14% di e mercado total di turistanan cu ta biaha pa aña.  Endy Croes a haci poco mas investigacion y mester bisa di acuerdo cu nos posicion geografico tin alrededor di 500 miyon hende ta biba dentro di un buelo di 4 hora pa nos destinacion.  Aunke e mercado mas grandi mundialmente di turistanan cu ta gasta mas ta di Asia y India. Pero biniendo bek riba turismo deportivo ta e momento pa gobierno crea espacio y delinea un plan cu competencianan anual cu por genera y atrae turistanan deportivo. Esaki sigur lo ta inversionnan positivo unda un otro mercado di hende lo cuminsa conoce y gusta Aruba como destinacion, ampliando y reforsando asina nos pilar economico number uno. Endy Croes ta termina splicando cu e tin un reunion pendiente cu Minister di Deporte unda lo sigui amplia riba e ideanan aki. Deporte no por para keto den e proximo 4 añanan nos dilanti y ta hunto nos lo mester percura pa atrae parti di e mercado di turista deportivo cual finalmente lo bay ta bon pa nos pais.