Parlamentario Edgard Vrolijk di MEP: Nos Libertador Betico Croes a laga den nos man e destino di nos pais

Diahuebs awor 25 januari pueblo ta celebra cumpleaños di nos lider inmortal Betico Croes y alavez ta recorda su maximo esfuersonan pa uni e pueblo di Aruba pa nos pueblo por a kibra e cadena cu tabata tin nos dushi isla Aruba mara, y cu su lucha incansabel na final a logra cu nos ta “baas in eigen huis”, cu e logro di nos Status Aparte.
Nos lider maximo tabata sa cu e tabatin un tarea hopi dificil, pasobra e pueblo tabata hopi segregra y p’esey nos lider maximo a dicidi pa duna e isla su identidad cu ta su bandera y su himno. Esaki a duna cada ciudadano e sentimento nacionalista y cu cada bes cu e bandera bula y nos scucha nos Himno “Aruba Dushi Tera” cada ciudadano por ta orguyoso di nos isla y cu pueblo completo tabata anhela pa nos isla ser reconoci rond di mundo y di por ta liber.
Awe nos como pueblo ta orguyoso di por mira nos bandera ta bula rond di mundo y tambe nos himno ta resona rond mundo, y cu mundo completo conoce nos isla y sigur lo mas importante nos por tin e destino di nos isla den nos propio man. Nos lider maximo lamentablemente no por a mira realisacion di su logronan y p’esey den hopi di su discursonan tabata manda e mensahe pa nos, nos yiu y nos futuro generacionnan: “Laga nos cuida nos Status Aparte manera un clompi diamante y laga nos yiunan y yiu di nos yiunan gara nos bandera, canta nos himno y conserva nos patria Aruba”.
Na momento cu cosnan ta bay dificil den e pais aki hamas nos tin cu perde speransa, pero nos tin cu sigui lucha y no laga e lucha di nos Libertador Betico Croes tabata envano. Nos Libertador a laga pa nos un pais cu nos tin cu cuida y conserva y e unico manera cu nos por logra esaki ta den UNION. Un feliz dia di Betico diahuebs awor.