Home Politics Prome Minister Wever Croes: VENEZUELA AINDA NO TA FIRMA ACUERDO

Prome Minister Wever Croes: VENEZUELA AINDA NO TA FIRMA ACUERDO

SHARE

Palabracionnan ta keda valido, nos pasaheronan no ta keda pega

Den conferencia di prensa di Gobierno dialuna mainta, Prome Minister a duna un “update” di e situacion di Venezuela. Despues di e reunion di 12 di januari entre delagacionnan di Venezuela, Aruba, Corsow y representante di Reino na Venezuela, e acuerdo cu mester a wordo firma no a wordo firma ainda door di Venezuela.

E mandatario ta bisa cu e intencion di e acuerdo aki tawata pa hunto nos conbati contrabando cu Venezuela a keha tanto di dje y di parti di Reino tin acuerdo riba esaki. Sinembargo apesar cu e acuerdo no a wordo firma, Gobierno di Aruba a cuminsa cu e accionnan pa conbati contrabando espacialmente riba koper.

Prome Minister a duna di conoce cu e medida impone pa Venezuela ta keda intacto. Venezuela no a lanta e medida ainda. Esaki kiermeen cu trafico aereo entre Venezuela y Aruba, Boneiro y Corsow no ta reestableci manera ta normal, locual kiermeen cu e situacion no a normalisa, sinembargo e palabracionnan cu tin cu nos pasaheronan no ta keda pega si ta keda valido y te ainda ta logrando trece nos hendenan bek.

Prome Minister ta ripiti: “E conseho di biahe pa Venezuela ta keda mescos. Si bo no mester bay, no bay pasobra e situacion no a normalisa ainda”.

E mandatario ta bisa cu mientras tanto e ta den contacto cu Minister di Asuntonan di Exterior di Hulanda, sr. Zijlstra cu constantemente ta den contacto cu e canciller na Venezuela. Den tur caso, e prome mandatario di nos pais ta bisa cu si Venezuela no firma e acuerdo mes, Aruba si a haci su banda y tuma e medidanan di precaucion pa conbati e actonan di contrabando y ilegalidad cu ta tumando luga y tambe ta buska alternativanan pa asina e efectonan di e medida ta lo menos posibel na Aruba.