25 di januari ta un fecha special pa Aruba. Un dia nacional na unda nos comunidad por goza di un dia liber. Un dia na unda nos ta recorda e fecha natalicio di nos Libertador Betico Croes kende lo a haci 80 aña.
Prome Minister sra. Evelyn Wever-Croes ta invita tur ciudadano pa celebra e dia importante aki. Ban hisa nos bandera y mustra nos orguyo di ta Arubano. Acudi na e celebracionnan cu tin rond di Aruba.
Gobierno di Aruba lo tin e acto protocolario mainta cu presencia di nos Gobernador, Ministernan, Parlamentarionan y mandatarionan invita. Lo tin e desvelo di un plakaat conmemorativo pa asina completa e renovacion di Plaza Libertador Betico Croes cu a inicia na 2015.
Parti anochi tin un manifestacion cultural na Plaza Betico Croes cu varios atraccionnan, tent di artesania y cuminda crioyo. Kids Corner, Dino Jump, pintamento di cara y mas actividadnan pa mantene nos muchanan contento.
Como un excepcion particular, e aña aki Gobierno a tuma e decision pa institui un comision cu tin e tarea pa graba e bida real di Betico Croes pa asina encorpora esaki den e curriculum di scolnan. Lo traha un website di e informacion real aki pa asina tur mucha por buska informacion ora di traha spreekbeurt of tambe pa siña mas di e storia real di e homber cu a haci asina hopi pa nos pais.
Actualmente, ta depende hopi di ken ta conta e historia y e detayes cu nan ta conta. Sinembargo, Aruba a mantene e memoria di Betico bibo pa asina e historia real por wordo documenta pa futuro generacionnan conoce e historia real di nos Libertador.
Prome Minister ta recorda un di e palabranan cu Betico a uza y semper a haci un impacto grandi ta ora cu el a bisa “Si mi cay na caminda, gara e bandera y sigui cu e lucha”. Y naturalmente esaki por wordo interpreta riba diferente nivel. Y e mandatario ta encurasha e pueblo di Aruba pa nos tur biba e palabranan di e gran estadistica aki.
“Gara e bandera y sigui cu e lucha. Den cada hogar tin lucha grandi cu ta tuma luga. Y esaki ta loke e tawata kiermeen, pa no laga nada stroba bo di yega locual ta bo meta. Pero tambe pa nos sigui cu e lucha pa bienestar general di henter nos comunidad.
Pabien Aruba. Ban celebra e dia aki na grandi”, tawata palabranan di encushamento di Prome Minister Evelyn Wever-Croes.