Despues di 32 aña di su partida di e mundo aki, nos di Aruba ta sigui admira nos libertador (qepd) Gilberto François “Betico” Croes. Ora nos wak e ultimo dos periodo di gobernacion di nos pais nos mester constata cu no tawata tin decencia, ni ideologia politico mas. Manera nos lider honorario Sr. Nelson Oduber a expresa: “Si den un pais bo vota pa ken cu ta, kico cu ta, cos ta bay con cu ta”. Kico nos tur por siña di esaki? Nos no por ‘para wak’ nos pais wordo destrui pa esnan cu no tawata respeta niun ley di bon gobernacion. Nos di MEP, e partido cu Betico a funda no a para keto bao liderasgo di nos lider Evelyn Wever Croes, ya cu henter nos organisacion politico ta hibando un trabao sobre humano pa rescata Aruba di su pio gobierno desde nos Status Aparte. Esnan cu ta considera nan mes ‘Betiquista’ no por laga e pida baranca aki wordo destrui, ni di forsanan externo mucho menos di forsanan interno. Nos sa e balor di nos Status Aparte y cuanto sacrificio a wordo haci pa logra esaki. Ta hustamente e lucha di Betico a pasa pa e siguiente generacionnan cu ta sinti e mesun ideal y compromiso den nan pecho manera nos gran estadista Betico Croes.
Union di e pueblo Arubano
Betico a funda MEP dia 9 di februari 1971 na Cumana 84, como un partido social democrata un movimiento popular a base di principionan democratico y cu un sentimento social pa bienestar di tur ciudadano den e pais aki. Den transcurso di añanan e partido a contribui grandemente na e desaroyo politico, estatal, economico y social di Aruba. Cu lidernan di bario di tur skina di Aruba a aproba e colornan y emblema di partido: color geel y cu letternan cora. E emblema ta simbolisa un parha bulando riba Aruba buscando su libertad y iluminacion den e rayonan briyante di solo. E aña aki e partido cu Betico a funda ta cumpli 47 aña di existencia hibando e deseo di nos libertador pa un Aruba liber y prospero pa un y tur sin distincion di rasa, credo, clase social y origen. Betico semper a destaca den su lucha ferviente pa trece union bao di tur ciudadano di Aruba y pa caba cu tur segregacion y division cu tabata existi riba e isla aki. Sin duda e union aki tabata determinante pa por realisa e causa di e pueblo Arubano, esta nos Status Aparte. Nos a siña di Betico pa lucha incansabelmente pa logra nos metanan sea politico of otro. Betico a crusa fronteranan entre otro, Colombia, Venezuela, Costa Rica, Panama, Hulanda, Inglatera, Merca, Nacionnan Uni y Organisacion di Estadonan Americano (OAS) mustrando cu nos por ta chikito pero nos tin e derecho di Autodeterminacion.
Un soño cu a bira realidad
Betico a lidera MEP pa 15 aña y el a percura na 1976 pa organisa un concurso den pueblo pa un diseño di nos propio bandera pa demostra nos amor patrio na Aruba y tambe nos otro simbolonan di union y libertad esta nos himno, escudo y nos ortografia etimologico di Papiamento. Betico a institui un departamento di Structura Estatal pa traha riba nos Status Aparte, tambe a logra e prome referendum politico den Reino Hulandes. Betico a hasta lidera Augustus Scur na aña 1977 ora cu a laga MEP como e partido di mas grandi afo di Gobierno Central, despues di a gana eleccion dia 17 di juni 1977 den forma aplastante. Betico a expresa: “No tin lucha sin sacrificio y no tin sacrificio sin gloria”. Despues di esaki, Hulanda a habri porta pa scucha e deseo di Aruba y esaki ta danki na nos libertador Betico Croes. Nos pais a conoce un union asina grandi cu un delegacion amplio a ser forma di partidonan politico, sindicatonan y gremio comercial pa viaha pa Hulanda y cuminsa traha riba Aruba su Status Aparte y cu a ser realisa dia 1 di januari 1986.
Betico nunca a biba pa mira su soño bira realidad pero nos di MEP tin e mesun compromiso y ideal di nos lider inmortal: “Un Aruba liber y prospero pa un y tur”.
Cu Dios por guia y conserva su amor pa libertad. Feliz Dia di Betico!!!