E presidente di CCDN 2018 durante e conferencia di prensa yama pa Minister di Finanzas, Asuntonan Economico y Cultura señora Xiomara Ruiz-Maduro y Comision Celebracion Dianan Nacional 2018 a informa riba e programa cu e comision a prepara pa e Ceremonia Cultural cu lo tuma lugar parti anochi riba Plaza Libertador Betico Croes.
Pa 6or y mey lo inicia cu un Feria Culinario Arubano y benta di productonan artesanal. Lo tin un cantidad di tentnan cu e publico lo por bishita. Ademas lo tin presentacion musical di Rondaya Universo di Aruba.
Pa 7or y mey di anochi ta spera yegada di invitado y mandatarionan. Pa 5 minuut pa 8 di anochi lo tin yegada di Su Excelencia Gobernador di Aruba, Sr. Alfonso Boekhoudt y su distinguida esposa.
Pa 8’or di anochi e Himno di Aruba lo wordo toca pa Orkesta Nacional Dia di Betico bao direccion di señor Johnny Scharbaay y canta pa e hoben Gaydiene Croes.
Despues lo sigui discurso di Su Excelencia Minister di Finanzas, Asuntonan Economico y Cultura señora mr. Xiomara Ruiz-Maduro.
Riba e programa lo sigui un recital di piano y Potpouri varia bow direccion di Johnny Scharbaay.
E presentacion na final lo wordo acompaña pa Grupo di Baile The Popcorn Dancers y piezanan di Carnaval di Carnaruba.
Por ultimo lo tin presentacion di Banda Musical “D’Licious”.
Sr. Flemming ta invita henter e pueblo di Aruba pa asisti na e ceremonia cultural riba Plaza Libertador organisa pa e Comision Celebracion Dianan Nacional 2018. Ademas ta pidi e pueblo pa asisti na e diferente actividadnan organisa den bario relaciona cu e dia special aki. Aruba Un felis Dia di Betico.