Partido MEP ta lamenta cu desde 2016 cu Gobierno di Venezuela a haci e intento pa yega na un acuerdo cu Gobierno di Aruba di e tempo ey lidera pa Mike Eman sinembargo e ex Minister aki no a duna e atencion debido na esaki. Y awo pueblo un biaha mas ta frusta y bergonsa mundialmente cu e crisis aki cu a escala te pa Gobierno di Venezuela tuma e decision unilateral pa cera frontera areo y maritimo entre Venezuela, Aruba, Corsow y Boneiro.
Un cos ta sigur, cu Mike Eman enbes di atende cu su responsabilidad, ta crisis so el a laga atras. Desde cu Gabinete Wever-Croes a drenta gobierno, a contra cu cuatro crisis grandi. E prome crisis ta e crisis di traspaso. Despues a bin encontra cu e crisis financiero cu tawata mas grandi cu a kere na unda a haya cifranan hopi mas halto di deficit. Y despues nos a wordo enfrenta cu un dolor inmenso cuasa pa e crisis social cu no a wordo atendi debidamente, cuasando morto di dos criatura. Y pa ultimo a bin acerca e crisis di Venezuela.
Tur e crisisnan aki por a wordo evita si e Gabinete di Mike Eman tawata poco mas diligente y serio. Pero esaki no tawata e caso. Riba e tema di Venezuela, specificamente Venezuela a expresa cu desde 2016 nan a haci un intento pa Gobierno di Mike Eman duna atencion na e practicanan di iligalidadnan di contrabando.
Sinembargo e Gobierno di Mike Eman cu aparentemente ta pro iligalidad y contrabando no a duna oido na e problema aki y desde 2016 Mike Eman a bira lomba pa e problema di Venezuela causando escalacion di e problema aki y Venezuela a cera e fronteranan y ainda no kier habri nan bek.
Opinion tocante regimen na Venezuela no ta hustifica pa Mike Eman haci loke el a haci. Na mas di un ocacion den gobernacion, Mike Eman no a cumpli cu su responsabilidad y esaki ta un di nan cu lamentablemente a trece frustracion y berguensa pa nos pueblo. Danki na e falta di accion y falta di vision como tambe danki na e fracaso di Mike Eman nos hendenan a keda pega na Venezuela y awe ainda nos tin un crisis cu Venezuela.
E gobierno di Gabinete Wever-Croes ta haciendo tur lo posibel pa atende cu esaki pa soluiciona e crisis aki cu a wordo ocaciona pa Mike Eman.