Home » Votando pa inicia negosacionnan relaciona cu Green Corridor Fraccion di MEP un biaha mas a demostra di ta para pa principio di bon gobernacion

Votando pa inicia negosacionnan relaciona cu Green Corridor Fraccion di MEP un biaha mas a demostra di ta para pa principio di bon gobernacion

by Admin
0 comment 63 views

Diamars ultimo a tuma luga un reunion publico den parlamento caminda Minister di Infrastructura sr. Otmar Oduber a presenta y p’asina trece padilanti su preocupacionnan pa loke ta e desaroyo di e proyecto di Green Corridor. Un proyecto cu na e momento aki ta den un fase critico y cu e mester haya e atencion y ayudo necesario pa por recupera di e crisis aki.

 

Actitud di sin respet

Den e reunion aki fraccion di MEP – despues di a scucha e disertacion di Minister Otmar Oduber kende den forma cronologico a describi henter e proceso di ehecucion di e proyecto di Green Corridor – a keda sorprendi di mira con e minister di Infrastructura anterior, esta sr. Benny Sevinger den un forma iresponsabel a trata henter e proyecto aki. Ta increibel pa kere cu e minister aki no sa con pa anda cu placa di pueblo den un proyecto cu ta suma na casi 300 miyon florin, ya cu den su propio expresion, e finalmente no ta ‘give a damn’ di kico lo para cu e proyecto aki. E actitud grocero y sin respet aki ta pone un y tur corda tambe riba e proyecto di Dump na Parkietenbos caminda e mesun Sevinger aki a percura pa destrui capital den e proyecto Solid Waste Management cu a suma na mas di 28 miyon florin di placa di pueblo.

 

Negligencia total

Tambe den e reunion a bin padilanti con sr. Sevinger for di inicio di e proyecto di Green Corridor na 2015 a neglisha completamente e consehonan cu a bin di DOW y cual instancia debi cu nan no tin e experticio necesario pa cu un proyecto di e magnitud di un Green Corridor a pidi minister Sevinger pa busca un compania externo pa fortifica e team di DOW, pero cu ta despues di un aña y mey e minister a dicidi di porfin cumpli cu e peticion aki.

Locual a preocupa fraccion di MEP mas tanto ainda tabata e echo cu a sali na cla cu tin como 500 fayo (mankementen) den henter e proyecto di Green Corridor. Y pio ainda cu e ingenieronan experto cu ta asesora gobierno no tin un bista cla con henter e proyecto a ser ehecuta y principalmente pa loke ta e infrastructura bao di tera. Tambe nan tin nan preocupacionnan pa loke ta construccion di e famoso brug riba Spaans Lagoen, esta e brug riba cual e Prome minister anterior a celebra su cumpleaños y a malgasta 142 mil florin di placa di pueblo.

 

AVP a vota contra mocion

Mirando e hecho cu awor e proyecto di Green Corridor a yega na un fase critico caminda cu  institutonan financiero ta a punto di saca e plug di e proyecto aki y exigi di inmediato e placa cu a ser hinca den e proyecto, no a keda minister Otmar Oduber nada otro di acudi na parlamento pa duna tur e informacionnan necesario y pidi apoderacion pa inicia negosacionnan cu e institutonan aki y cual reunion lo cuminsa diahuebs 18 di januari. Remarcabel durante e reunion den parlamento tabata cu e gran mayoria di e parlamentarionan di AVP no a hiba palabra pa defende e maneho descabeya hiba pa nan colega ex-minister Sevinger.

 

Como un fraccion responsabel, MEP hunto cu e fraccionnan di POR y RED a bin cu un mocion caminda ta apodera minister Oduber pa inicia cu e negoscionnan necesario y pa despues bin bek parlamento y wak con conhuntamente cu parlamento lo por sali for di e crisis aki di Green Corridor. Lamentablemente pa cu e mocion aki henter fraccion di AVP a vota contra y asina a mustra cu te ainda nan no kier madura y crece, no kier aplica transparencia y bon gobernacion, pero ta keda pega den tempo y ta prefera pa pueblo keda recorda nan como e stempelparlement legitimo di AVP.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio