ORANJESTAD, Aruba – Directiva di Aruba Hotel and Tourism Association (AHATA) a tene nan prome reunion di 2018 hunto cu nan miembronan. E reunion tabata exitoso, unda cu e miembronan presente a duna hopi feedback riba e presentacionnan cu nan a ricibi. Cada kwartaal Aruba Hotel and Tourism Association (AHATA) tin nan reunion, unda cu ta haci diferente presentacion p’e miembronan di e asociacion.
E miembronan presente na e reunion a ricibi presentacion di Asociacion di Banco di Aruba, CEDE Aruba y Aruba LionFish Initiative Foundation, asina Jim Hepple, Acting CEO di AHATA a indica. Pa mas cu 1 aña AHATA ta haciendo e reunionnan. “Nos lo sigui cada 3 luna cu e programa aki”, asina el a indica. Ta haci e reunionnan aki pa 2 motibo, cual e prome ta pa duna informacionnan di topiconan manera con banconan no lo sigui acepta check. “Loke nos kier haci ta provee oportunidadnan na nos miembronan pa siña y haci pregunta si nan tin”, Jim Hepple a expresa. E di dos motibo ta p’e oportunidad di netwerking, di cual e miembronan por conoce e managernan di e hotelnan.
Aruba LionFish Initiative Foundation (ALFI) tabata presente na e reunion di AHATA y a duna un presentacion na e miembronan riba kico nan ta haci pa combati LionFish y riba e turismo di medio ambiente, kendenan ta envolvi den e medio ambiente di e pais. Presidente di e fundacion Ed Egan a elabora cu dentro di algun siman nan lo introduci un producto di buceo (dive) conhuntamente cu nan partner di buceo. Esaki ta pa asina haya mas turista envolvi pa asina nan por captura LionFish. Mester captura LionFish y mas hende participa ta mas miho. E fundacion ta ofrece e producto aki p’e sector turismo y na mes momento pa persevera e rif di Aruba. Door di kita e LionFish ta safe e bida di rif y tambe ta safe Aruba su naturalesa bunita, cual esey ta e atraccion pa turistanan. “Nos tin cu haci esaki pa turistanan”, el a expresa. Desde aña pasa cu e fundacion a cuminsa captura e pisca venenoso aki pa asina safe e medio ambiente, unda cu ta pone e pisca den mercado pa seafood.
AHATA a invita Aruba Bank pa duna informacion riba e descontinuacion di uzo di cheque, unda cu Rocila Acosta, Director Ehecutivo di Aruba Bank, a haci esaki. E presentacion tabata basa riba e investigacion haci aña pasa di e analisacion p’e uzo di buki di cheque na Aruba y mira kico por haci pa mehora y trece eficiencia den e sector bancario. Tin un grupo chikito ta haci uzo di buki di cheque, pero ta haci esaki na gran cantidad y e ta un impacto grandi den comunidad. A analisa un tiki mas pakico ta uza buki di cheque y hopi biaha ta uza esaki pa paga salario pa esunnan cu tin contract temporario, pa petty cash of pa haci comprasnan. Den e presentacion di Aruba Bank, Rocila Acosta a mustra cu e bukinan di cheque ta algo di hopi añanan 50 y awo 68 aña mas leu, banconan a haci desaroyo riba e tereno di pagonan digital.
Pa cada uzo di un buki di cheque, tin un solucion digital y a mustra riba esaki. “Hopi di nan ta custumbra di uz’e. Esey ta e manera cu semper nan a uz’e y eigenlijk nan tin un tiki miedo pa bay na e manera nobo”, asina Rocila Acosta a expresa. Aruba Bankers Association a tuma e decision tambe cu lo bay descontinua bukinan di cheque, unda a cuminsa cu e proceso di informa clientenan. Asina aki a duna e companianan 1 aña pa descontinua e uzo di bukinan di cheque. Aruba Bank a splica e miembronan di AHATA riba e cambio aki y a curasha nan pa contact nan banco pa cualkier pregunta.
Daniel Tecklenborg, director CEDE Aruba, a presenta e organisacion na AHATA y miembronan riba kico tur nan ta haci pa comunidad di Aruba, unda cu ta yuda otro organisacionnan bira conoci den comunidad. E meta cu nan a duna presentacion tabata papia riba e idea di “volume tourism” y conecta e sector di turismo mas cu iniciativanan local, social cu tin na Aruba.
CEDE Aruba tin diferente proyecto social, unda cu nan a cuminsa cu “Volunteer of the year ceremony” cual pa nan tabata uno exitoso. Ainda nan kier desaroya proyectonan concreto cu ta bira interesante pa turistanan bishita y contribui na e iniciativanan local. A papia cu AHATA riba e idea aki, unda cu lo desea di haci encuesta cu e miembronan interesa pa asina conecta iniciativanan local cu turistanan. “Nos ta sinti cu e interes ta positivo. Nos ta bay traha riba stap pa stap riba proyectonan chikito, p’asina nos por realisa e meta aki”, el a termina di indica.