Companianan Hulandes contracta pa 10 miyon florin pa bin establece nan mes na Aruba a cambio pa Mike Eman duna lectura algun biaha pa aña na Den Haag
Durante ultimo conferencia di prensa di fraccion di MEP parlamentario Endy Croes a bin cu poco documento masha interesante. Segun Endy a splica cu Mike Eman y AVP a derocha miyones di e pais aki y a plunder nos pida baranca di tal forma lagando un desaster financiero atras. Dos contracto cu semper Mike Eman a broma cu nan tabata e proyecto di companianan Hulandes TNO y tambe esun di Phillips Lighting. E dos proyectonan aki ta costa pais Aruba algo mas di 10 miyon florin. Placa cual sigur por a wordo mihor inverti. Dos compania Hulandes cu Mike a trece Aruba derochando placa di pueblo cual finalmente ningun di dos a crea empleo pa nos comunidad cu ta den hopi necesidad pa empleo y e placa aki ta bay straight Hulanda, pues no ta keda lora akinan. Phillips Lighting su contracto ta pa pone algun luz na Plaza Padu y den algun edificio di gobierno cual proyecto ta costando Aruba riba 5 miyon. Adhunto mi lo publica parti di e contract cual ta stipula di 2017 pa 2022 marando Aruba na man cu pia sin cu esaki ta trece un cen preto den caha. Con hende por ta abusador di estado aki? TNO ta un otro contracto cual a wordo prolonga y firma 17 di september 2017 promer cu eleccion pa 4 aña. Otro contracto di mas di 5 miyon. Con leu e hendenan aki kier a hiba e pais aki? Con por ta posibel cu ningun parlamentario di AVP e tempo aya no por a “ring the bell.” Gewoon stempel parlament lagando tur cos pasa sin cuida interes di e pueblo aki. Nos ta hopi decepciona cu e manera di proceder di Mike Eman y AVP destrostrando e pais aki financieramente. Te hasta durante reunionnan di IPKO algun parlamentario di Hulanda a menciona chistosamente cu e homber ey falta un “tik” y pues ta cuestiona su forma di maneha un pais. Esun di TNO, aparte di e suma extravagante cu ta paganan, Land Aruba mester paga un huur astronomico y den e contract Land Aruba mester percura pa e lugar ta full ingericht . Kico ta e beneficionan real pa pais Aruba cu e dos contractonan aki? Hopi hende un por paga meter di awa. Nos por a inverti e 10 miyon aki pa yuda hendenan pober kisas cu nan meter di awa? Masha hopi mucha ta bay school te cu awe sin un desayuno. Nos por a brinda mas subsidie na fundacionnan cu ta yuda nos comunidad? Wel hopi otro cos por a wordo haci unda e comunidad por a sinti un efecto directo. Mike su unico obhetivo tabata complace companianan Hulandes pagando nan miyones di caha di pueblo pa bin establece nan mes akinan a cambio cu nan lo paga un ticket di avion y algun anochi den un bon hotel pa algun biaha pa aña e bay duna un lectura na Den Haag. Recientemente nos por a observa Mike saliendo pa Hulanda. Nos lo keda haci nos trabao informando pueblo di e cadavernan nobo cu nos ta encontrando cada siman den lachi. Increibel pero berdad.