Durante su bishita na Aruba pa cera conoci cu Gobierno Nobo y alabes reuni cu varios personanan pa obtene informacion di e desaroyonan tumando luga na Aruba, e Secretario di Estado, encarga cu asuntonan di Reino Raymond Knops a duna un entrevista cortico na unda el a expresa cu el a haya bon impresion di Aruba y di Gobierno expresando tambe cu cu el a
sinti e energia y gran positivismo cu e Gobierno di Aruba ta trahando.
Sr. Knops a expresa cu e reunion cu Gabinete a bay bon na unda el a haya e oportunidad pa cera conoci cu e Ministernan y nan cartera y retonan. Tambe el a menciona cu su conbersacion cu Prome Minister Evelyn Wever-Croes a bay bon na unda cu el a menciona na Prome Minister cu e ta sinti un enegria grandi pa resolve tur e problemanan cu nos pais ta confronta y a enfatisa cu importante ta pa inverti den e relacion den Reino y tambe cu otro paisnan mas ainda awo cu tin tensionnan den e ultimo dianan cu Venezuala lo ta bon pa tur traha hunto y haci compromisonan pa mehora e relacionnan.
Riba e pregunta con Secretario Knops ta mira e futuro di Aruba mirando e situacion financiero dificil, el a contesta cu den su conbersacion cu Prome Minister y Minister di Finansas sra. Xiomara Ruiz-Maduro el a wordo informa di e situacion financiero como tambe di e plan di Gobierno pa yega na un presupuesto balansa. A mustra sr. Knops tambe cu Gobierno kier cumpli cu palabracionnan cu CAFT, kiermeen cu mester economisa pero tambe pa Gobierno ta importante pa inverti. Na final sr. Knops a bisa cu el a sinti e actitud di compromiso den e Gobierno nobo pa traha hunto logra cosnan bon.