Un proyecto di gobierno anterior di MEP
Parlamentario Hendrik Tevreden a tuma nota di parlamentarionan di oposicion cu ta haci cierto remarkenan contario na loke a purba di haci durante e reunionnan di IPKO esta di etrecha e amistad y e forma di dialoga y comunica den Parlamento. E Parlamentarionan di oposicion aki den rueda di prensa y riba medionan social ta bisando cu awo si porfin bishitantenan pa IPKO lo bay mira trabounan y proyectonan di pasado. Parlamentario Tevreden a elabora riba esaki como lo siguiente:
“Tur proyecto cu gobiernonan ta haci, ta pa pais Aruba. Si e proyecto ta bon lo mira continuacion y e proyectonan cu ta menos bon naturalmente lo mira un cambio of un ahuste den e esakinan”.
Parlamentario Hendrik Tevreden a remarca of recorda e Parlamentario di oposicion aki cu ta nobo den e arena politico, cu mayoria di e proyectonan cu el a menciona den rueda di prensa, bisando cu e hendenan a keda asombra di nan, ta proyectonan cu e Gobernacion anterior di MEP a percura pa nan.
E Parlamentario ta menciona especialmente e proyecto di energia renobabel bisando cu ta mas cu evidente y cu tur hende sa cu e turbinanan di biento cu ta trece e cantidad di megawatt mas halto pa pais Aruba, ta un proyecto cu e gobierno anterior di MEP a bin cune, esaki a sosode den comparacion cu un Gobierno cu a proclama cu e ta green y a trece solamente 3% di energia renobabel aden y cu un gasto mucho mucho mas grandi. “Nos tin di ta serio den nos remarkenan na pueblo”, e Parlamentario a bisa.
E Parlamentario kier haci un peticion na e Parlamentario aki tambe pa “please blijf bij de les”, paso remarkenan cu un Parlamentario ta duna na pueblo ta importante pa por educa y haci bo pais mas sabi tambe.
Parlamentario Tevreden a duna di conoce cu e puntonan cu a wordo atendi durante IPKO ta: “Small Islands Development States”, tambe a pasa riba e consecuencianan di Horcan Irma na St. Maarten, e situacion na Venezuela, a toca tambe e tema tocante e penitentiaire inrichting y e werkboek nobo di Dr. Horacio Oduber Hospital.
Na Dr. Horacio Oduber Hospital, e Parlamentarionan di Reino a pasa den e gebouw, nan a haya un rondleiding y tin cu bisa cu e management team ta trahando duro pa tur loke ta falta wordo cumpli cu nan. Parlamento awo ta pendiente di e quickscan, p’asina haya sa precies unda e placa cu a wordo inverti ultimamente a wordo aloca, pasobra manera a sali den prensa siman pasa, ainda tin cierto problemanan cu e asunto di diesel y otro partinan di Hospital unda e Parlamentarionan a cana nan tabata wordo bisa cu tin urgencia pa e quickscan keda cla pa asina nan por bay atende cu e casonan aki atrobe.