ORANJESTAD – Durante un reunion publico di Parlamento yama cu urgencia, Gobierno a duna un relato riba e status di e proyecto di Green Corridor – un di e obranan infrastructural di mas grandi cu nos a yega di conoce den e ultimo trinta añanan. Na final di e reunion partidonan cu ta sostene e coalicion, a presenta un mocion unda ta duna Gobierno autorisacion pa drenta den negociacion pa e siguiente fase di ehecucion di Green Corridor. Ignorando e manifestacionan politico cu a tuma lugar durante dia, Parlamentario Richard Arends di AVP no a sostene e mocion aki y a splika den forma concreto cu un parlamento cu kier wordo respeta mester sa su posicion consitucional.
“E unico instrumento cu Parlamento tin pa duna un autorisacion na Gobierno ta un ley,” Sr. Arends a splika. “Un mocion ta simplemente un expresion di un sentimento di Parlamento pa Gobierno hasi su mihor esfuersonan pa cumpli su cu esakinan. Gobierno no ta mara legalmente na esaki, ni obliga na ningun accion contreto.” Segun Parlamentario Arends, e mocion presenta pa partidonan di coalicion ta superfluho, mirando cu e ley existente ta duna e minister encarga cu infrastructura espacio pa hasi e negociacionan necesario pa cu e siguiente fase di e obra en cuestion. “Si kier a adapta esaki, lo mester a presenta un cambio di ley”.
Como partidonan di coalicion a opta pa ancra nan deseo pa Gobierno duna cuenta di e negociacionan den un mocion, e minister concerni por bin back Parlamento y bisa cu no a logra cumpli cu e deseo manera stipula den e mocion. Esaki ta hasi e efecto di e mocion completamento nulo. “Parlamento ta co-legislador y no co-gobernante,” Sr Arends a splika. “Esaki ta un diferencia substancial y nos como parlamentarionan cu kier hiba un politica nobo mester por hasi e distinccion aki. Mester remarka cu e reunion publico aki a wordo yama riba peticion di Gobierno y no pa Parlamento mes. Nos tarea ta pa controla Gobierno y transparencia den Gobernacion no ta nifica cu Parlamento ta bay sinta riba stoel di Gobierno,”