ORANJESTAD- Diadomingo ultimo fraccion di AVP a reuni cu Secretario di Estado Knops di Asuntonan Interior y di Relacionnan di Reino pa discuti puntonan cu ta di importancia pa partido AVP y Aruba. Na final di e reunion miembro di Parlamento Richard Arends a duna un splicacion cortico con cos a bay sin bay den detaye riba e contenido di e reunion mes.
“Nos a topa cu Knops caba, pero awe como fraccion di AVP nos a cera un poco miho conoci cu ne. Pa sa entre otro kico ta su interesnan y con e ta mira e relacion cu Aruba. No solamente nos como fraccion actual pero tambe varios di nos como ex mandatario a elabora riba nos maneho . Nos a conte kico nos a desaroya, di e proyectonan cu nos a laga atras, pero tambe e posicion constructivo cu nos como oposicion ta hibando awor aki.”
Arends a bisa cu e reunion a bay den bon ambiente. E tabata hopi ameno, hopi fructifero. “Nos a papia cu Knops pa scucha di dje con e ta mira e relacionnan den Reino, e relacion cu Aruba. E maneho cu nos a hiba, pero tambe e kier sa con como oposicion nos lo keda traha hunto cu Hulanda pa loke ta trata e retonan nos dilanti. Na final di e reunion nos mescos cu sr. Knops a keda masha satisfecho con cosnan a bay.”