Lider di fraccion di POR den Parlamento, Marisol Lopez-Tromp dunando informacion riba e reunion publico di diamars a bisa cu e reunion aki mester a tuma lugar den sala di Parlamento pasobra tin un ex minister (Benny Sevinger) cu no a give a damn.
E ta bisa cu Minister Otmar Oduber a haye obliga, ora el a hereda un situacion di negligencia pa cu un proyecto cu ta costa nos pueblo como 300 miyon, pa bay informa Parlamento como debe ser riba un situacion unda cu e tin cu bay negocia.
Minister Oduber a acudi na Parlamento pa pidi e blessing pa negocia un situacion cu a bay completamente for di man y unda hasta e fiadornan kier ‘pull out e plug’ pa loke ta placa, pasobra no tin confiansa mas y no a cumpli cu e palabracionnan cu a wordo haci.
E mentalidad di no give a damn ta hinca e proyecto aki y nos pais den un crisis y awe un Parlamento nobo mester bay tuma un decision riba esaki.
Parlamentaria Marisol Lopez-Tromp kier sa dicon Directie Financien ni Departamento Huridico no tabata envolvi. Tambe dicon despues cu DOW a pidi pa extra expertise, pa un compania externo bin fortificanan for di 2015, ta te despues di 1 aña y mey esaki a bin aden. No solamente esey, ora e compania a bin aden e la constata un cantidad di fayo, entre nan nada mas y nada menos cu 500 manquement.
Con e ex minister no a haci nada, Marisol Lopez-Tromp y fraccion di POR no ta compronde, pasobra e ta na final esun responsabel pa e proyecto y como minister su firma bal hopi y lo mester para pa tur aspecto di e proyecto ta den bon condicion.
Un pregunta hopi importante cu lider di fraccion di POR a haci ta e pakico no tin notulen di e reunionnan relaciona cu e proyecto aki, unda esakinan ta y si no tin dicon no tin, pasobra ta trata di un proyecto di 300 miyon di placa di pueblo y como tal representantenan di pueblo y pueblo en general tin e derecho pa sa kico a wordo palabra den e reunionnan y ta kico ta e motibo pa cual DOW a trek aan de bel pa loke ta e desaroyo di e Green Corridor. “Falta di e documentonan aki ta inaceptabel!”, Lopez Tromp a expresa.
Igualmente el a lamenta cu hustamente ex minster Sevinger cu awe ta den Parlamento, a gaba departamentonan y personal cu el a neglisha durante su periodonan como minister.
Sra.Lopez Tromp tabata esun encarga den nomber di henter coalicion pa presenta e mocion cu a haya sosten di mayoria di Parlamento. E mocion ta bisa cu cu ta duna Minister di Ruimtelijke Ontwikkeling , Infrastructuur en Milieu e apoderacion di Parlamento di Aruba pa inicia cu negociacionnan necesario cu Caribbean Infrastructure Company (CIC) y pa despues bin bek pa informa Parlamento di e reunion y busca aprobacion pa e proximo pasonan cu lo mester tuma.
“Nos ta vota pa transparencia y ta spera cu otro colega tambe samina nan consenshi y vota na fabor di transparencia y no para pa e onder onsje cu tabata tuma lugar y cu a conduci na e situacion di crisis den cual nos ta aden awe pa loke ta e proyecto di Green Corridor”.
Cu e apoderacion aki ta habri caminda pa Minister Oduber reduci e daño financier cu Pais Aruba lo sufri debi na e negligencia di e mandatario anterior.
Lamentablemente esaki no a tuma lugar y miembronan di oposicion no a sostene e amienda, cual cu sosten di 12 miembro di Parlamento y 7 en contra a wordo aproba.