Home » En conexion cu renobacion di Hospital su edificio existente Cuido Ambulatorio a muda pa piso 5

En conexion cu renobacion di Hospital su edificio existente Cuido Ambulatorio a muda pa piso 5

by Admin
0 comment 52 views

 

 

ORANJESTAD, Aruba – E departamento di Cuido Ambulatorio cu tabata ubica riba piso 1 a muda recientemente pa piso 5 di Hospital su edificio principal, esta Toren A, unda antes tabata departamento di Maternidad. Prome cu e dia di mudamento ya caba tur cos tabata cla pa asina e mudamento ta uno exitoso y rapido.

 

Zorgmanager di Cuido Ambulatorio, sra. Filomena Brooks a duna di conoce cu esaki lo bira un departamento hopi mas amplio  den futuro y p’e motibo ey nan mester a muda bay otro piso temporalmente pa asina e contratista por haya chens di haci e trabounan necesario. Nan lo ta ubica awo riba piso 5 desde dialuna 15 di januari 2018 te ora cu e trabounan di renobacion keda cla pa asina nan por muda bek den nan departamento completamente renoba riba piso 1.

 

Despues cu e trabounan di renobacion keda cla, lo bay tin diferente cambionan. Un diferencia grandi ta cu e lo ta 2 biaha mas grandi y asina aki nan lo tin e potencial pa ubica mas pashent. Na e departamento aki ta yega pashent cu ta bay haci un operacion chikito y por bay cas e mesun dia, esta un ‘dagopname’. E cambio aki ta un adelanto pa comunidad di Aruba, pasobra por atende mas pashent na e Sala di Operacion. “Si nos por yuda mas pashent riba un dia cu por bay cas e mesun dia, e ta algo hopi bon pa tur involvi”, asina sra. Brooks a duna di conoce.

Aworaki tin un total di 14 pashent cu por keda na mes momento den un sala grandi, pero riba piso 5 tin 4 camber di cual por ubica 4 pa 6 pashent pa camber. Nan ta haci uzo di e camanan continuamente y door di tin mas espacio tin potencial awo pa por yuda mas pashent pa dia.

 

E mudamento a bay bon, unda cu a cuminsa hiba mayoria cos pa piso 5 un dia anterior caba. Enfermero Jarvis Winklaar a duna di conoce cu nan tabata warda pa algun cos keda cla pa asina por a sigui muda tur cos p’e piso 5. “Loke ta importante p’e pashent sa cu e proceduranan ta keda mescos. Na momento cu e pashent mester haci algo cerca nos na Cuido Ambulatorio, e ta meld cerca e empleado di siguridad abou den e edificio principal manera custumber”, asina Jarvis Winklaar a duna di conoce.

Asina aki e empleado di siguridad lo mustra e pashent pa drenta lift, primi piso 5 y na momento cu e porta habri, esaki ta habri unda antes tabata e piso di departamento di Mucha y departamento di Maternidad. “Bo ta cana bin na man drechi pa bay unda antes tabata departamento di Maternidad, primi e boton y bay na balie unda cu bo persona ta meld”, el a sigui duna di conoce. E enfermeronan lo duna instruccion sea cu e pashent ta bay di biaha na su cama of e tin cu warda pa su turno di operacion.

 

Den e siguiente dianan Hospital lo sigui cu diferente preparacion pa asina e renobacion por tuma luga minimalisando molester pa pashent, bishitante y trahado. Trahando na un manera responsabel y sigur p’e pashentnan  ta un prioridad fundamental pa e institucion aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio