Home » Parke Nacional Arikok: E Plan di Maneho pa Spaans Lagoen ta den fase di Ehecucion

Parke Nacional Arikok: E Plan di Maneho pa Spaans Lagoen ta den fase di Ehecucion

by Admin
0 comment 76 views

ORANJESTAD – E trabownan ta sigi na Spaans Lagoen caminda a inicia e ehecucion di e Plan di Maneho pa e area importante akinan cual por cierto a wordo reconosi internationalmente na aña 1980 como un area Ramsar. E area di Spaans Lagoen sigur ta un parti cu tin balor cultural, historico y geologico y ademas ta trese cune un biodiversidad inmenso y merese e atencion y cuido apropia.

Spaans Lagoen a wordo traspasa oficialmente pa Parke National Arikok (PNA) na Maart 2017 durante un bishita di su Mahestad Princess Beatrix. E area ta cubri un total di 70 hectare y ta connecta cu PNA. Desde e momento di traspaso PNA a monitor e area akinan y alaves a traha riba un Plan di Maneho. E Plan di Maneho lo wordo publica dentro poco y lo por wordo lesa pa full e comunidad di Aruba via e website di PNA www.arubanationalpark.org.

E punto nan di atencion cu ta di importancia pa e area akinan lo ta e maneho y restoracion di habitat y especienan, e recreation y acceso publico di e area di Spaans Lagoen, maneho di especienan invasivo, y proteccion legal pa e area. Por ultimo lo sondia y monitor e area completo caminda por comunica na varios manera e resultado nan y necesidad pa cu e area di Spaans Lagoen.

Asina caba por menciona cu a pone borchi nan di regla nan cu e bishitante nan mester tene cuenta cune. E borchi nan lo asisti e proceso di sondeo den e area akinan caminda lo analisa e situation di Spaans Lagoen na e momento nan aki cual resultado ta benificioso pa PNA y tur persona, organisacion cu ta hasi uso recreativo di e area akinan. E Ramsar area akinan asina lo ricibi e atencion necesario mirando cu e Aruba tin un area relativamento chikito pa proteha y conserva cu otro isla of pais nan mas grandi.

Spaans Lagoen lo ser maneha bow di e mesun reglanan di PNA y adicionalmente lo tin un area restringi pa bishitante cual lo ta e recorido cu ta anexo di e mangel nan y lagoon. E area akinan di aproximadamente 1 km ta hopi sensitivo y lo por wordo bishita solamente bow guia di un Ranger di PNA. Esaki lo asisti PNA den nan esfuerso di conservacion, protection y sondeo. Na e momento nan aki e area ta conta cu hopi trafico cual PNA kier dune su tempo pa recupera. E area akinan ta di suma importancia pa e flora y fauna caminda mester regula y maneha e acceso pa asina limita y of preveni un impacto na e naturalesa.

Den un sondeo priliminar a conclui cu tin aproximadamente 250 especie di flora y fauna, di cual por cierto algun di e flora y fauna akinan ta wordo protehi bow leynan local y internacional. Sigur esaki lo funhi como un nulmeting pa e area di Spaans Lagoen y nos lo por mira di serca con esaki lo sigi avansa den transcurso di e ehecucion di e Plan di Maneho di Spaans Lagoen.

Den e proximo dianan y simanan nos lo sinta cu diferente stakeholders y partnersnan pa asina nos presenta e Plan di Maneho na nan caminda nos por intercambia diferente punto nan di importancia ya asina nos por garantisa e existencia y calidad di nos area Ramsar pa e comunidad di Aruba y e futuro generacion cu tambe tin e derecho di disfruta di e area akinan.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio