Actualmente nos ta pasando den un impase bastante desagradabel cu e Gobierno Venezolano, debi na nan desicion di sera tur frontera cu Aruba, Boneiro y Corsou.
Esaki a crea un tension grandi entre reino Hulandes y Venezuela, mirando cu tin un cantidad di residente di e islanan ABC pega na Venezuela sin por bay bek na nan lugar di residencia.
Despues di basta negociacion cu e Gobierno di Venezuela, a logra acorda cu nan lo permiti salida di e residentenan di Aruba, tanto e ciudadanonan Hulandes, pero tambe esnan cu ta residencia legalmente akinan.
Directie Luchtvaart na Aruba y INAC na Venezuela a logra yega na un acuerdo pa pone tres vuelo cu lo bay trese bek e residentenan di nos isla, for di Venezuela.
E vuelonan lo sali for di Valencia, Maracaibo y Las Piedras cu destino directo pa Aruba y lo bay asina te ora cu saca tur nos residentenan for di e pais aki.
Den e comunicacion cu tabatin entre Aruba y Venezuela, a enfatisa den e hecho cu e situacion di nos residentenan local cu ta pega na Venezuela no ta humano.
Teniendo na cuenta cu nos residentenan local cu ta aya na Venezuela, a bay cu un budget pa algun dia, pero awor cu e ceramento di frontera aki logicamente nan placa lo ta cabando of lo a caba.
Loke nos Gobierno ta sugeri na tur esnan cu tin pensa of plania di biaha pa Venezuela, ta pa warda y no bay pa awor.
Mester corda cu ainda ta existi e situacion tenso entre Venezuela y Caribe Hulandes, pasobra e prohibicion ta vigente keto bay, cual ta hasi cu nos Gobierno no por garantisa e seguridad y integridad di esnan cu dicidi di bay Venezuela.
Posiblemente lo por yega na un solucion pa cu e impase aki diabierna awor, pero pa tur seguridad nos ta avisa nos ciudadanonan pa no bay Venezuela den e temporada aki.