Nos a tuma nota di e comentationan di ex Minister Mike de Meza kende ta cuestionando e Gobierno di Aruba riba e tema di Hedging y ta sali den medionan di comunicacion treciendo informacionnan incorecto riba e situacion di Hedging sin splica realmente e diferencia entre e Hedging iresponsabel cu el a haci mientras cu e tabata den Gobierno y e Hedging responsabel di e Gobierno actual cu si ta uno responsabel.
Prome Minister di nos Pais, sra. Evelyn Wever-Croes a cuminsa un investigacion riba e Hedging anterior, e Hedging di Gobierno di AVP na unda nan a masacra WEB y a hisa prijs di awa y coriente pa henter e pueblo. Den esaki, e rol di Mike de Meza ta hopi dudoso kende tambe lo wordo investiga como e minister encarga cu WEB y causante di e Hedging iresponsabel di e gobierno anterior.
E forma manera Hedging a bay ta haci cu Mike de Meza ta e ultimo hende cu por cuestiona e tema di Hedging. Al contrario di e desaster cu Mike de Meza a haci cu Hedging cu a causa un problema mas bien pa henter Aruba, Gobierno di Aruba y Prome Minister Evelyn a dicidi di bay bek na normalidad.
Esaki kiermeen cu lo bay bek na e maneho di tempo di Gobierno di MEP cu si acaso mester Hedge mes, lo Hedge solamente si mester y na e forma responsabel esta na un pakete chikito, pa un temporada cortico y semper cu e condicion cu si e prijs baha, nos costo tambe ta baha hunto cu e prijs. Esaki ta e Hedging cu Gobierno a permiti pa WEB haci awo cu e ser humano central como meta.
Vision di Gobierno ta keda e mesun vision cu Partido MEP semper tabata tin, esta pa baha e prijs di awa y coriente. WEB por si tin e necesidad di Hedge pero cu e exigencianan di Gobierno. Hedge lo pasa solamente si esaki bay na e manera di MEP, e manera responsabel pa na fin di dia baha prijs di awa y coriente.
Na Mike de Meza nos ta bisa “een toontje lager” pasobra pronto resultadonan di investigacion ta mustra su envolvimiento real den esaki y e manera iresponsabel cu el a Hedge.