Home » GOBIERNO NOBO TA TRAHANDO PA YEGA NA TRANKILIDAD Y NORMALIDAD ENTRE ARUBA Y VENEZUELA!

GOBIERNO NOBO TA TRAHANDO PA YEGA NA TRANKILIDAD Y NORMALIDAD ENTRE ARUBA Y VENEZUELA!

by Admin
0 comment 52 views

Gobierno anterior tabata dehado y no a tuma accion den e importacion illegal di productonan for di Venezuela

ORANJESTAD– Durante conferencia di prensa di Gobierno di Aruba Minister Sra. mr. Xiomara Ruiz-Maduro a splica riba e trabaonan cu gobierno di Aruba y su ministerio a bin ta haci basa riba e decision di Presidente di Venezuela di cera e comunicacion areo y maritimo entre Venezuela y Aruba pa 72 ora desde siman pasa diabierna, cual decision ta keda vigente te diamars 9 di januari si no bin escalacion.

E mandatario a acentua, cu mester bisa si cu locual ta pasando aki ta un escalacion cu desde 2016 gobierno di Aruba di e tempo ey tabata na altura di e situacion di ilegalidad di productonan di Venezuela cu no mag di pasa e frontera pero cu e productonan aki tog ta bini Aruba. Desde 2016 a hala atencion y a pidi gobierno anterior pa tuma accion den esaki pero e gobierno no a haci net nada.

E escalacion aki a contribui cu na comienso di aña aki Venezuela a tuma medida den e parti di comunicacion aereo y maritimo. Gobierno di Aruba diasabra ultimo a reuni cu departamentonan di Douane, Kustwacht, Havenmeester, Immigracion y Departamento di Relacion Exterior pa mira kico ta e señanan y mira kico concretamente por haci aki na Aruba.

Riba nivel di Reino, Embahador di Hulanda a reuni cu e vice president El Aissami di Venezuela y den cual nan a indica cu e.o. cu nan ta spera un accion di parti gobierno di Aruba. Aunke ta bisa cu ta concerni e tres islanan Aruba, Boneiro y Corsow, mester bisa cu ta waak cu Aruba ta mas prominente den e problematica aki.

For di esaki ta wordo referi na dje pa locual ta e producto di koper, cu ta drenta Aruba illegal. Door cu na Venezuela tin hopi problema cu hortamento di kabelnan koper y cu ta yega Aruba cu barco chikito pa importacion y pasa pa exportacion. Aki ta unda e dolor ta sinta y cual ta pidi accion di Gobierno di Aruba.

Banda di esaki tin productonan cu ta ilegal cu no mag di wordo exporta for di Venezuela pero tog ta bin finalisa den nos supermercadonan. Minister Ruiz-Maduro a sigui trece dilanti cu si ta asina cu no tin un lista ainda di Venezuela, pa locual ta e productonan specifico cu no mag wordo exporta for di Venzuela.

A acorda cu diabierna dia 12 di januari proximo lo bay tin un reunion di expertonan caminda den esaki Venezuela lo bay duna claridad riba e productonan cu nan ta considera cu ta illegal pa exporta.

Pueblo di Aruba lo por bay mira accionnan di parti Departamento di Asuntonan Economico, e mandatario a trece dilanti cu ela duna instruccion pa intensiva e control pa combati illegalidad. Mas y mas por mira hende cu ta bende productonan banda di caminda y tambe mester control den supermercadonan. Banda di e hecho aki cu ta bini di parti Venezuela, mester bisa cu esaki ta algo tambe cu pueblo a bin ta pidi for di hopi tempo caba, cu nan kier mas control pa locual ta supermercadonan. E control aki mester ta mas specifico y no lubida cu aki ta trata salud tambe di nos pueblo. No por bende productonan banda di caminda sin tin e control debido riba esaki.

Venezuela ta pidi pa tin control pa combati illegalidad y pa locual ta aduana, a sinta na mesa y pa esaki ta importante pa tin un claridad cual ta e productonan specificamente cu Venezuela ta considera illegal pa cruza nan frontera.

Pa locual ta trata Barcadera y contrabando di koper, esaki ta significa cu na e momento aki ta contemplando un paro di importacion di koper, den e caso aki, esta koper cu no ta certifica, no mag wordo importa.

Ta trahando riba e parti legal pa esaki. Mester bisa cu tin compania akinan cu ta importa koper y tambe pa doorvoer, pero na momento aki mester tin certificacion di e koper su procedencia.

Minister Ruiz-Maduro a sigui trece dilanti cu a compronde cu e problema ta cu na Venezuela ta bin ta horta un cantidad di koper, tambe ta horta kabelnan fiberoptic, un negoshi grandi. Den caso di Aruba ta menciona cu e parti di kabel di koper y ademas ta wordo papia cu oro tambe ta pasa cu avion via Aruba.

Den e caso aki e mandatario a trece dilanti locual e departamento cu ta cay bao responsabilidad di finansas y economia, lo bay ta haciendo pa combati illegalidad. Un economia cu ta basa riba ilegalidad na momento cu esaki sali afor bo pais ta sufri di dje.

Nos pais Aruba tin lasonan mercantil y tambe familiar cu Venezuela, nos kier keda bon bisiña y mester keda bon cu otro. Den e caso aki cu tin un escalacion pasobra for di 2016 e gobierno anterior tabata dehado y no a bin ta haci nada pa combati e importacion illegal y awe e gobierno nobo ta cu e reto aki.

E gobierno nobo a bin ta trahando riba esaki y nos mester tin e trankilidad y pa nos yega na normalidad entre e dos paisnan aki y tambe den Reino, pa nos economia no mester sufri pa locual ta pasando na pais Venezuela.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio