Home Politics Rudy Richardson di MEP: Di manipulacion ‘structura’ pa periodo di ‘hipnocracia’ di...

Rudy Richardson di MEP: Di manipulacion ‘structura’ pa periodo di ‘hipnocracia’ di AVP

SHARE

Un feliz y prospero 2018 y cu cada hogar aki na Aruba por tin felicidad y prosperidad pa biba un bida dignamente. Esaki ta un derecho universal di cada ser humano. Nos a cera aña 2017 cu un otro constelacion den Parlamento di nos pais, consecuentemente un Gobierno nobo di Gabinete Evelyn Wever-Croes, esta un coalicion MEP/POR/RED. Aña pasa e gobierno nobo a tuma su tempo pa inventarisa e situacion real di nos pais. E traspaso di Gobierno di AVP tabata uno caotico, cu a tuma e gobierno nobo algun siman prome cu por a cuminsa tuma decisionnan riba nivel di gobernacion. Sin lubida cu nos tabata tin un tragedia nacional cu a buta nos Minister di Asuntonan Social Sr. Glenbert Croes expresa :”Ta tempo pa basha abao”.

Explosion social
Referiendo na e negligencia cronico cu Gabinete Mike Eman a laga nos pais y den un deteriorio social hamas bisto, nos Prome Minister sra. Evelyn Wever-Croes a expresa: “Esaki no por sucede nunca mas”. Expresionnan fuerte pero sigur al caso mirando cu ora dos criatura perde nan bida na un manera cruel, esaki ta bisa algo di tur di nos biba riba e isla aki. Kisas hopi no kier a tende e gritonan, cu nos tabata drentando e prome fase di un “explosion social” door di un maneho liberal sin tene cuenta cu e necesidadnan di esnan mas vulnerabel den nos sociedad.

Desaster laga atras
Aña 2018 a habri y Gobierno di Aruba a pidi Gobierno di Hulanda espacio riba maneho di finansa publico. Despues di 32 aña di Status Aparte nos tin un Gobierno nobo cu tin un supervision financiero riba dje, algo hamas bisto, pero esaki ta e desaster cu Sr. Mike Eman a laga atras. E realidad a keda tapa door di un manipulacion “structura” cu a yega su fin pero nos por wak awo cu e fraccion berde di AVP a bay den un fase di “hipnocracia”, un tactica di hipnotisa esnan cu ainda ta kere den storianan di Compa Nanzi y ignora tur e rapportnan y bagamunderia combina cu un sinberguenseria cu tabata sucede na gran escala den e gobierno anterior. Sr. Eman a expresa: “Cu awo oponentenan ta mira e balor di Aruba renoba”. E ta referi na Caya Betico Croes cu a bira un ghosttown, unda cu a gasta miyones y miyones den un beyesa cu a costa nos tur nos paz mental. Locual ta sorprendi mi mas ainda ta cu Sr. Eman publicamente ta admiti cu tur e decisionnan descabeya di su Gabinete a laga Aruba cu recursonan limita pa sigui progresa. Na San Nicolas ainda tin proyectonan para, pero tur esfuerso tabata e “Caya grandi” di AVP. San Nicolas a keda den e mesun estado pa no menciona e tristesa economico, financiero, academico, deportivo di e districto. Sr. Eman a bay busca voto den tur otro districto cu su MFA’s den Noord, Paradera y Savaneta lagando San Nicolas cu un Hulpbestuurskantoor sin servicio adecua pero su partido a logra haya voto preferencial toch pasobra a usa e refineria como cabay di campaña y awe e refineria ta 8 luna atrasa y pueblo ta wak awo e manipulacion hiba cu fondonan publico.

Retonan di presupuesto
Placa di AZV, ATA, SVB y e desorden den Lotto di Aruba pa menciona algun cu a sali e ultimo simannan cu Gobierno di AVP no a traspasa pero a hiba un maneho financiero manera e cancion di artista Ricky Martin “La Vida Loca”. AVP a kere cu nan lo a gana cu 15 asiento segun Sr. Eman pero a logra 9 asiento so y awo ta den bankinan di oposicion. Retonan di presupuesto 2017 y 2018 cu e gobierno nobo tin cu bay soluciona, pues nos como pueblo a paga un set di gobernante un schat di placa pero e trabao no a wordo haci, anto ainda algun di e politiconan aki ta den Parlamento. Sr. Eman mes cu ta “votegetter” cu 147 coordinador riba su payroll a core sali bay den su penthouse y e no tabata tin e corahe pa defende su mal maneho cu a perhudica henter pueblo y cu a buta interes personal riba interes nacional.

Comienso di un era nobo
Awe nan ta yora persecucion politico lubidando cu ta contract nan tawata tin cu Gabinete Eman I y II pa un periodo defini. Realidad ta e retonan di Hospital, Green Corridor, Watty Vos Blvd. Un comercio tranca rond Aruba y cu mester wordo revitalisa pa por carga nos pueblo dignamente. Nos Prome Minister actual su metanan ta sincero. Nos ta bay baha awa y coriente, nos ta bay bin cu control di prijs den supermercado y tambe crea mas cuponan di trabao. Esaki ta apenas e comienso di un era nobo. Falta San Nicolas su “Masterplan”, falta hopi mas pero sigur ta un alivio pa wak un Prome Minister cu ta traha den forma transparente, sincero y kier buta e ser humano central den su maneho. Un gobierno asina semper lo tin mi respaldo y nos lo sigui den direccion di progeso pa tur hende. Manera nos Libertador inmortal Sr. Betico Croes (qepd) a bisa: “Si mi cay na caminda, gara e bandera y sigui cu e lucha”. (If I might go under along the way, pick up the flag and go on with the fight).