Home Politics Ban celebra carnaval den un ambiente sano y dushi!

Ban celebra carnaval den un ambiente sano y dushi!

SHARE

ORANJESTAD- Diasabra anochi como mandatario encarga cu Cultura, den nomber di Gobierno di Aruba, Su Excelencia Minister Xiomara Ruiz-Maduro a duna inicio na e temporada di Carnaval 64 di Aruba.

Tabata un bunita anochi yen di ambiente caminda miles di persona a bay celebra e inicio di e fiesta cultural mas grandi di nos pais, un parada espectacular cual Minister Ruiz-Maduro tambe a participa aden.

Un total di 9 grupo cu un total di alrededor di 10 mil participante cu animacion di brassband y bandanan musical a disfruta di e parada di flambeu diasabra anochi riba e ruta.
Un cantidad di persona para na banda tambe a gosa di e ambiente cu a reina den e gruponan y participantenan.

Minister Ruiz-Maduro ta desea henter e pueblo y especial e participantenan un felis temporada di carnaval y ban disfruta di esaki sanamente. Palabranan di exito ta bay na e organisacion SMAC, organisacionnan musical, cantantenan, compositor-, areglistanan, tur grupo di carnaval y participante-, diseñador-, cosedor-, welderdo y decoradornan y comercio pa nan contribucion y sosten.

Ademas minister Ruiz-Maduro ta desea exito na tur trahador di e departamento- y instancianan concerni manera Cuerpo Policial, Infrastructura, Salud, Turismo, Cultura y tambe tur organisacionnan boluntario cu ta contribui y duna nan aporte pa nos por celebra nos carnaval dushi yen di ambiente y creatividad pero sigur na ordo y bon organisa. Feliz Carnaval Aruba henter!